ԵՐԵՎԱՆ, 2 մարտի - Sputnik. Սահմանադրական առաջիկա փոփոխություններով իշխող քաղաքական ուժը մտադիր է ՀՀ ԶՈւ Գլխավոր շտաբը մտցնել ՀՀ պաշտպանության նախարարության կազմի մեջ։
Այս մասին այսօր ԱԺ–ում լրագրողների հետ զրույցում հայտնեց ԱԺ «Լուսավոր Հայաստան» խմբակցության նախագահ Էդմոն Մարուքյանը` հավելելով, որ իր տեղեկություններով, այդ նախագծի վրա «Իմ քայլում» արդեն աշխատում են։
«Բայց ես նայեցի, տեսա, որ խորհրդարանով այդ փոփոխությունը չեն կարող անել` առանց ռեֆերենդումի։ Սա պրոբլեմ է իշխանության համար»,– ասաց Մարուքյանը` հավելելով, որ այդուհանդերձ, բազմաթիվ այլ փոփոխություններ իշխանություն կարող է անել խորհրդարանի որոշմամբ` չսպասելով հանրաքվեին։
«Օրինակ` ինչ են ասում, ասում են՝ ուզում են նախագահի ինստիտուտն ուժեղացնել, թող բերեն խորհրդարանով դա անեն։
Բազմաթիվ մեխանիզմներ կան, որ, եթե Փաշինյանի կամքը իրական է` վրայից այդ սուպերվարչապետական կոստյումը հանելու, ինքը կարող է սկսել դա խորհրդարանից ու դրանով ցույց տալ, որ ինքն այդ կամքն ունի»,– ասաց Մարուքյանը։
Ներքաղաքական իրավիճակը Հայաստանում սրվեց այն բանից հետո, երբ ՀՀ ԶՈւ Գլխավոր շտաբը փետրվարի 25-ին պահանջեց ՀՀ վարչապետ Նիկոլ Փաշինյանի հրաժարականը, ասելով, որ քաղաքական ղեկավարությունը պետությունը տանում է դեպի վտանգավոր սահմանագիծ։ Դա տեղի ունեցավ այն բանից հետո, երբ վարչապետը պաշտոնից հեռացրեց Գլխավոր շտաբի պետի առաջին տեղակալ Տիրան Խաչատրյանին։
Օնիկ Գասպարյանը պետք է հեռանա. ըստ Փաշինյանի` ո՞րն է ԳՇ պետի դավաճանությունը
Ի պատասխան Նիկոլ Փաշինյանը հայտարարեց ռազմական հեղաշրջման փորձի մասին և քաղաքացիներին կոչ արեց հավաքվել Հանրապետության հրապարակում՝ «հեղափոխությունը պաշտպանելու» համար։
Նա հայտնեց նաև, որ ստորագրել է Գլխավոր շտաբի պետ Օնիկ Գասպարյանին պաշտոնից հեռացնելու փաստաթուղթը, որը, սակայն, ՀՀ նախագահ Արմեն Սարգսյանը չստորագրեց և հետ ուղարկեց փետրվարի 27–ին։ Նույն օրը վարչապետը կրկին առաջարկությունն ուղարկեց ՀՀ նախագահին։
Գլխավոր շտաբը մարտի 1-ին նոր հայտարարություն տարածեց նշելով, որ կրկին հաստատում է ստեղծված իրավիճակի վերաբերյալ իր գնահատականները և շեշտում, որ, անկախ Զինված ուժերը քաղաքական գործընթացների մեջ ներքաշելու փորձերից, մնում Է անդրդվելի, կշռադատված և հաստատակամ։
