ԵՐԵՎԱՆ, 2 մարտի – Sputnik. Եթե Զինված ուժերի գլխավոր շտաբում չլինեն Փաշինյանի հրաժարականի պահանջով հայտարարությունը ստորագրած գեներալները, կլինեն ուրիշները։ ԳՇ–ն դրանով չի վերանա։ Այս մասին այսօր ԱԺ–ում լրագրողների հետ ճեպազրույցում ասաց «Իմ քայլը» խմբակցության պատգամավոր Արմեն Խաչատրյանը:
«Իրենք չլինեն ԳՇ-ում, մեկ ուրիշը կլինի, դա պետական ինստիտուտ է, ով ուզում է` մեջը լինի։ Ինստիտուտը կա, լինելու է, դա պետական ինստիտուտ է, գեներալներով կամ անձերով չի պայմանավորված»,- ասաց Խաչատրյանը:
Իշխանական պատգամավորը լրագրողներին խոստացավ իր տեսակետն ավելի մանրամասն ու հիմնավոր ներկայացնել վաղը` մարտի 3-ին։
Բայց այսօր նաև ավելացրեց, որ իր համոզմամբ, բանակը միշտ եղել և մնում է Նիկոլ Փաշինյանի կողքին:
«Այո՛, բանակը Փաշինյանի կողքին է, այդ 40 հոգին բանակ չի, դա կորպուսի հրամանատարներն են, բայց բանակը չէ»,- ասաց նա պատգամավորն ու իր աշխատասենյակի դուռը փակեց լրագրողների երեսին:
Հիշեցնենք` ներքաղաքական իրավիճակը Հայաստանում սրվեց այն բանից հետո, երբ ՀՀ ԶՈւ Գլխավոր շտաբը փետրվարի 25-ին պահանջեց ՀՀ վարչապետ Նիկոլ Փաշինյանի հրաժարականը, ասելով, որ քաղաքական ղեկավարությունը պետությունը տանում է դեպի վտանգավոր սահմանագիծ։ Դա տեղի ունեցավ այն բանից հետո, երբ վարչապետը պաշտոնից հեռացրեց Գլխավոր շտաբի պետի առաջին տեղակալ Տիրան Խաչատրյանին։
Օնիկ Գասպարյանը պետք է հեռանա. ըստ Փաշինյանի` ո՞րն է ԳՇ պետի դավաճանությունը
Ի պատասխան Նիկոլ Փաշինյանը հայտարարեց ռազմական հեղաշրջման փորձի մասին և քաղաքացիներին կոչ արեց հավաքվել Հանրապետության հրապարակում՝ «հեղափոխությունը պաշտպանելու» համար։
Նա հայտնեց նաև, որ ստորագրել է Գլխավոր շտաբի պետ Օնիկ Գասպարյանին պաշտոնից հեռացնելու փաստաթուղթը, որը, սակայն, ՀՀ նախագահ Արմեն Սարգսյանը չստորագրեց և հետ ուղարկեց փետրվարի 27–ին։ Նույն օրը վարչապետը կրկին առաջարկությունն ուղարկեց ՀՀ նախագահին։
Գլխավոր շտաբը մարտի 1-ին նոր հայտարարություն տարածեց, նշելով, որ կրկին հաստատում է ստեղծված իրավիճակի վերաբերյալ իր գնահատականները և շեշտում, որ անկախ Զինված ուժերը քաղաքական գործընթացների մեջ ներքաշելու փորձերից, մնում Է անդրդվելի, կշռադատված և հաստատակամ։
