ԵՐԵՎԱՆ, 27 փետրվարի - Sputnik. ՀՀ վարչապետ Նիկոլ Փաշինյանը Facebook-ի իր պաշտոնական էջում տեսանյութ է հրապարակել, որում առանձնացված են փետրվարի 25-ի երթի «պատշգամբային» պահերը։
«Գնում եմ կառավարություն, նիստ կանենք և որոշում կկայացնենք». Փաշինյանն ավարտեց երթը
«Նախօրեի երթի ամենամեծ տպավորությունը պատշգամբների էներգետիկան էր։
Շնորհակալություն»,– գրել է Փաշինյանը։
Տեսանյութում ներկայացված են այն պահերը, երբ երևանցիներն իրենց պատուհաններից ու պատշգամբներից ողջունում են վարչապետ Փաշինյանի առաջնորդած երթի մասնակիցներին։
Տեսանյութում, բնականաբար, ներկայացված չեն այն պահերը, երբ Փաշինյանի հրաժարականը պահանջող քաղաքացիներն իրենց պատշգամբներից իրենց այդ տեսակետն են ներկայացնում։
Հիշեցնենք` փետրվարի 25–ին, Փաշինյանի կողմնակիցների երթի ժամանակ մի տղամարդ պատուհանից բացականչել էր. «Նիկոլ, արի ստե հլը, արա»։ Վարչապետը նրան ժպիտով արձագանքել էր. «Հանգիստ, հանգիստ» ու կամաց ավելացրել`քո հետևից էլ կգան։ Այս միջադեպին ականատես Աննա Հակոբյանն ու Փաշինյանի դուստրը ծիծաղել էին։
Այդ կադրերը միանգամից տարածվեցին համացանցում ու խիստ բացասական արձագանքի արժանացան։
