ԵՐԵՎԱՆ, 27 փետրվարի - Sputnik. Վաղ առավոտից սոցիալական կայքերում ու տելեգրամ ալիքներում տեղեկություններ են տարածվում այն մասին, որ հայաստանյան դիվանագիտական կորպուսն առաջիկայում կարող է միանալ ԶՈւ պահանջին՝ վարչապետ Նիկոլ Փաշինյանի հրաժարականի վերաբերյալ։
Ըստ տեղեկատվության, ԱԳՆ–ում այս հարցով քննարկումներ են ընթանում։ Որպես արտաքին գերատեսչության ընդդիմանալու պատճառ նշվում է այն, որ իշխանությունն ԱԳՆ–ին թույլ չի տվել պատասխանել Թուրքիայի վերջին հայտարարություններին` կապված Հայաստանում ստեղծված ներքաղաքական իրավիճակի հետ։
Թե իրականում ինչ է տեղի ունենում ԱԳՆ–ում, Sputnik Արմենիային պարզել չհաջողվեց. դիմել ենք արտգործնախարարությանը, սակայն դեռ պատասխան չունենք։
ՀՀ ԶՈւ Գլխավոր շտաբը փետրվարի 25-ին պահանջեց ՀՀ վարչապետ Նիկոլ Փաշինյանի հրաժարականը, ասելով, որ քաղաքական ղեկավարությունը պետությունը տանում է դեպի վտանգավոր սահմանագիծ։ Դա տեղի ունեցավ այն բանից հետո, երբ վարչապետը պաշտոնից հեռացրեց Գլխավոր շտաբի պետի առաջին տեղակալ Տիրան Խաչատրյանին։
Ի պատասխան Նիկոլ Փաշինյանը հայտարարեց ռազմական հեղաշրջման փորձի մասին և քաղաքացիներին կոչ արեց հավաքվել Հանրապետության հրապարակում՝ «հեղափոխությունը պաշտպանելու» համար։
Նա հայտնեց նաև, ստորագրել է Գլխավոր շտաբի պետ Օնիկ Գասպարյանին պաշտոնից հեռացնելու փաստաթուղթը, որը, սակայն, դեռ չի ստորագրել ՀՀ նախագահ Արմեն Սարգսյանը։
Մարտի 1-ին ԱԺ խորհրդի նիստ կգումարվի
Նույն օրը Երևանում զուգահեռ հանրահավաքներ ու բողոքի երթեր անցկացվեցին։ Նիկոլ Փաշինյանն ու իր կողմնակիցները հավաքվել էին Հանրապետության հրապարակում, իսկ ընդդիմադիրները` Հայրենիքի փրկության շարժման նախաձեռնությամբ Ազատության հրապարակում պահանջում էին Նիկոլ Փաշինյանի հրաժարականը։
Ընդդիմադիրները Բաղրամյան պողոտայում` ԱԺ-ի դիմաց, անժամկետ նստացույց են իրականացնում։
