ԵՐԵՎԱՆ, 25 փետրվարի - Sputnik. Բաղրամյան պողոտայում անժամկետ հանրահավաքի մասնակիցները շարունակում են վրանների տեղադրման աշխատանքները՝ Ազգային ժողովի մոտ գիշերելու համար։ Տեղում են նաև մեծ թվով հոգևորականներ։ Իրենց խոսքով՝ եկել են հնարավոր բախումները կանխելու համար։
«Մեր ներկայությունն առաջին հերթին պայմանավորված է նրանով, որ հանկարծ այս ամենը չվերածվի քաղաքացիական բախումների»,- նշեց Տեր Եսայի քահանա Արթենյանը։
Հոգևորականը վստահ է, որ երկրում ստեղծված լարված իրավիճակի հանգուցալուծումը հնարավոր է միայն առողջ բանականության ու երկխոսության, այլ ոչ թե բռունցքների ու պառակտումների ճանապարհով։ Տեր Եսայիի խոսքով՝ մեր հասարակությունն արդեն իսկ պառակտված է, հիմա համերաշխություն ու համախմբում է պետք։
Անդրադառնալով ՀՀ ԶՈւ Գլխավոր շտաբի հայտարարությանը` քահանան նշեց, որ այն հաստատում է մի բան՝ իրավիճակը շատ լուրջ է, և արագ լուծումներ են պետք։
ՀՀ ԶՈւ Գլխավոր շտաբն այսօր` փետրվարի 25-ին, պահանջեց ՀՀ վարչապետ Նիկոլ Փաշինյանի հրաժարականը, ասելով, որ քաղաքական ղեկավարությունը պետությունը տանում է դեպի վտանգավոր սահմանագիծ։ Դա տեղի ունեցավ այն բանից հետո, երբ վարչապետը պաշտոնից հեռացրեց Գլխավոր շտաբի պետի առաջին տեղակալ Տիրան Խաչատրյանին։
Ի պատասխան Նիկոլ Փաշինյանը հայտարարեց ռազմական հեղաշրջման փորձի մասին և քաղաքացիներին կոչ արեց հավաքվել Հանրապետության հրապարակում՝ «հեղափոխությունը պաշտպանելու» համար։
Նա հայտնեց նաև, ստորագրել է Գլխավոր շտաբի պետ Օնիկ Գասպարյանին պաշտոնից հեռացնելու փաստաթուղթը, որը, սակայն, դեռ չի ստորագրել ՀՀ նախագահ Արմեն Սարգսյանը։
Նույն օրը Երևանում զուգահեռ հանրահավաքներ ու բողոքի երթեր անցկացվեցին։ Նիկոլ Փաշինյանն ու իր կողմնակիցները հավաքվել էին Հանրապետության հրապարակում, իսկ ընդդիմադիրները` Հայրենիքի փրկության շարժման նախաձեռնությամբ Ազատության հրապարակում պահանջում էին Նիկոլ Փաշինյանի հրաժարականը։ Նրանք հայտարարել են, որ Բաղրամյան պողոտայում` ԱԺ-ի դիմաց, անժամկետ նստացույց են իրականացնելու։
