ԵՐԵՎԱՆ, 22 վետրվարի - Sputnik. Այսօր վարչապետ Փաշինյանի հրաժարականի պահանջով ընդդիմության երթի ժամանակ լրագրողների հետ զրույցում, մեկնաբանելով ԱԺ «Իմ քայլը» խմբակցության անդամ Անդրանիկ Քոչարյանի հայտարարությունը պետական շենքերի գրավման դեպքում պետության կրակելու իրավունքի մասին, ԲՀԿ անդամ Նաիրա Զոհրաբյանը գործող իշխանությանը հիշեցրեց 2018թ-ին Հանրային ռադիոյի ու այլ պետական շենքերի գրավման մասին:
«Իրենք հայտարարում էին, որ հեղափոխության ժամանակ ցանկացած գործողություն իրավական է»,- ասաց Զոհրաբյանը:
Ընդդիմադիր պատգամավորը նաև հղում արեց Մարդու իրավունքների եվրոպական կոնվենցիային, որի համաձայն, եթե ժողովուրդը սպառում է արդարության վերականգնման սահմանադրական բոլոր ճանապարհները, ապա լեգիտիմ է նաև ապստամբության իրավունքը:
Նաիրա Զոհրաբյանն ուղիղ եթերում դիմեց Արարատ Միրզոյանին՝ պահանջելով ԱԺ արտահերթ նիստ հրավիրել ու քննարկել Անդրանիկ Քոչարյանի այն հայտարարությունը, թե իշխանությունը կկրակի ժողովրդի վրա:
Հիշեցնենք՝ Հայրենիքի փրկության շարժման առաջնորդ Վազգեն Մանուկյանը հայտարարել էր կայծակնային արագությամբ ապստամբելու հավանականության մասին՝ որպես պլան Բ: Ի պատասխան ԱԺ «Իմ քայլը» խմբակցության պատգամավոր Անդրանիկ Քոչարյանը «Ազատություն» ռադիոկայանին տված հարցազրույցում նշել էր, որ բոլորը պետք է գիտակցեն` անվտանգության համակարգի հետ կատակներ չեն անում, և, եթե մտածում են շենքեր գրավելու մասին, թող մտածեն նաև, որ դրանք գտնվում են պետական պահպանության տակ, ինչը նշանակում է, որ պետությունը մոնոպոլ իրավունք ունի կրակելու։
Նշենք, որ ընդդիմության բողոքի երթը մեկնարկել է Արաբկիր վարչական շրջանի Վահագն Դավթյանի անվան այգուց (Պրահայի այգի, Արաբկիրի թաղապետարանի դիմաց): Այն Բաղրամյան պողոտայով կհասնի Ֆրանսիայի հրապարակ, որտեղ նախանշված է իրականացնել անհնազանդության ակցիա:
