ԵՐԵՎԱՆ, 15 փետրվարի - Sputnik. Մանկական քաղցկեղի դեմ պայքարի միջազգային օրը «Սիթի Օֆ Սմայլ/Ժպիտների քաղաք» բարեգործական հիմնադրամը և «Զանգակ» գրատունը նախաձեռնել են «Գիրքը կարող է կյանքեր փրկել» խորագրով միջոցառում։ Այս մասին տեղեկացնում է «Զանգակ» գրատունը։
Այսօրվա ընթացքում գրատան վաճառված գրքերի շահույթի մի մասը փոխանցվելու է «Սիթի Օֆ Սմայլ/Ժպիտների քաղաք» հիմնադրամին՝ քաղցկեղ և արյան հիվանդություններ ունեցող երեխաների բուժման համար։ Երեխաները օրվան ընդառաջ պատրաստել են փոստային նվեր-բացիկներ՝ ակցիային մասնակցողների համար։
«Զանգակ» գրատների ցանցը հինգ մասնաճյուղ ունի Երևանում՝ Աբովյան 7, Կոմիտասի պողոտա 49/2, Մեգամոլ Արմենիա, 2-րդ հարկ, Դալմա գարդեն մոլ, 2-րդ հարկ և Ռիո մոլ, 2-րդ հարկ։
Նշենք, որ փետրվարի 15-ը մանկական քաղցկեղի դեմ պայքարի միջազգային օրն է: Յուրաքանչյուր տարի աշխարհում հայտնաբերվում է մանկական քաղցկեղի մոտ 200,000 նոր դեպք և ամեն օր 250 երեխա մահանում է քաղցկեղից: Ըստ հայաստանյան վիճակագրական տվյալների՝ ամեն տարի Հայաստանում միջինում 80-100 երեխայի մոտ քաղցկեղ է ախտորոշվում: Սակայն այս հիվանդության մահացու ելքից կարելի է խուսափել վաղ կանխարգելման միջոցով:
«Դու մենակ չես». Գավառի դատարանի 5–ամյա «շեֆն» ու ցավոտ կատետորները. ինչ է երազում Աշոտը
