ԵՐԵՎԱՆ, 12 փետրվարի - Sputnik. Սյունիքում ՀՀ–ից տարածքներ են խլում։ Այսօր Ազատության հրապարակում Վազգեն Մանուկյանի հրավիրած հանրային հավաքի ժամանակ լրագրողների հետ ճեպազրույցում ասաց ՀՀ նախկին վարչապետ Հրանտ Բագրատյանը` մեկնաբանելով իր հրապարակած գաղտնի փաստաթղթի նշանակությունը Սյունիքի համար։
«Ես կասկած ունեմ, որ իրականում Ղարաբաղից մնացել է 2.5 հազար քառ/կմ։ Սյունիքից մինչև Տավուշ, ինչպես նաև` Նախիջևան, «տալաշ–տալաշ» այդ 2.5 հազարը Ալիևը վերցնելու է, որ հետո որոշի` Ղարաբաղին ինչ կարգավիճակ տա։ Ես կարծում եմ, որ գոյություն ունի այսպիսի հանցավոր գործարք»,– ասաց Բագրատյանը։
Նա փաստեց, որ Սյունիքի ճանապարհը, հակառակ իշխանության հայտարարությունների, ամբողջությամբ հայկական տարածքով է անցնում։ Նրա խոսքով, սակայն, Ադրբեջանը տեղ–տեղ անցել է ճանապարհը, խորացել Հայաստանի տարածքում ու վերցրել Գորիս– Դավիթ Բեկ, Կապան–Ճակատեն հատվածները։
«Ճանապարհը կառուցվել է ԽՍՀՄ օրոք` Հայկական ԽՍՀ Մինիստրների խորհրդի որոշմամբ։ Ադրբեջանական ԽՍՀ Մինիստրների խորհուրդը չի ընդդիմացել։ Խորհրդային Միության ռազմական քարտեզները նայեք։ «Գուգլը» կաշառքը վերցրել է՝ գիծը տարել է»,– ասաց նա։
Հիշեցնենք` ՀՀ նախկին վարչապետ Հրանտ Բագրատյանը Facebook-ում գրառում էր արել, որում նշել էր, որ Նիկոլ Փաշինյանը ստում է, երբ ասում է, որ Հայաստանի և Արցախի սահմանները համաձայնեցված են բանավոր։
Ընդդիմությունը ՀՀ իշխանություններից պահանջում է պարզաբանել Սյունիքի մասին փաստաթուղթը
Նրա խոսքվ, ռուսական անվտանգության սպան Սյունիքում իրեն է տրամադրել ՀՀ և Ադրբեջանի միջև ստորագրված 6 կետից բաղկացած հուշագրի կրկնօրինակը, որով կարգավորվում են Գորիս-Դավիթ Բեկ ու Կապան - Ճակատեն ճանապարհների անվտանգությունը ապահովելու կողմերի պայմանավորություները։
Բագրատյանը հուշագրի լուսանկարը հրապարակել էր իր FB էջում։
Հիշեցնենք, որ արցախյան 44-օրյա պատերազմի հետևանքով Ադրբեջանի ենթակայության տակ անցան ԼՂՀ որոշ շրջաններ։ Այնուհետև սկսվեց Հայաստանի և Ադրբեջանի սահմանների հստակեցման գործընթացը, ինչը մեծ դժգոհություն առաջացրեց Սյունիքի սահմանամերձ բնակավայրերի բնակիչների շրջանում։
Իրավիճակը հատկապես սրվեց Կապան–Գորիս ճանապարհահատվածի, ինչպես նաև Ճակատեն, Դավիթ Բեկ, Որոտան և Շուռնուխ գյուղերի պատճառով։
