ԵՐԵՎԱՆ, 11 փետրվարի – Sputnik. ԱԺ փոխնախագահ Ալեն Սիմոնյանի հեղինակած նախագիծը, որով առաջարկվում է փոփոխություններ կատարել Հայաստանի Հանրապետության քաղաքացիական օրենսգրքում, այսօր բավական բուռն քննարկման արժանացավ խորհրդարանում։
«Լուսավոր Հայաստան» խմբակցության պատգամավոր Անի Սամսոնյանը նախագծի հեղինակից հետաքրքրվեց. «Պարոն Սիմոնյան, դուք ազնի՞վ եք զրպարտության և վիրավորանքի դեմ պայքարի ձեր նպատակներում»։
«Տիկին Սամսոնյան, ես կարծում եմ` ձեր հարցը շատ ավելի այլ նպատակ էր հետապնդում, որը ես չեմ ողջունում, որովհետև մենք այստեղ չենք քննարկում ինձ կամ ձեզ: Մենք այստեղ քննարկում ենք զրպարտությունն ու վիրավորանքը, որը կարծում եմ՝ այս դահլիճում որևէ մեկին անմասն պետք է չթողներ, բայց ես ուրախ եմ, որ այս առավոտով ես ձեզ հնարավորություն տվեցի, որ ինքնարտահայտվեք»,-պատասխանեց Ալեն Սիմոնյանը։
ԱԺ նախագահ Արարատ Միրզոյանը նկատեց. «Պարոն Սիմոնյան, օրը ոնց որ լավ էր սկսվում, պետք չի»:
«Բարգավաճ Հայաստանի» պատգամավոր Գևորգ Պետրոսյանն էլ հայտարարեց. «Մարդկանց կենսամակարդակը նվազում է, ֆեյքերը շատանում են, տուգանքները բարձրացնում եք։ Ո՞րն է տրամաբանությունը»։
Ինչ փաստաթուղթ են ցույց տվել Ալեն Սիմոնյանին Մոսկվայում եռակողմ հայտարարությունից առաջ
Նախագծի հարակից զեկուցող, արդարադատության փոխնախարար Վահե Դանիելյանը պատասխանեց, որ խնդիրը քրեական պատասխանատվություն սահմանելուց ձեռնպահ մնալն է։ Փոխնախարարը հիշեցրեց, որ նախկինում` մինչև 2010թ–ը, ՀՀ–ում վիրավորանքի ու զրպարտության համար քրեական պատասխանատվություն էր սահմանված, և այդ հոդվածը պատժի նպատակ էր հետապնդում։
Այսօր գործող օրենսդրությամբ նախատեսված է մինչև 2 մլն տուգանք։ Բայց, Դանիելյանի խոսքով, այդ չափը գրեթե չի կիրառվում։
«Դատարանները կիրառում են 50 000-100 000 դրամ տուգանք։ Այսինքն` այդ առավելագույն դեպքերը ոչ միայն բացառություն են, այլ գրեթե չեն հանդիպում»,– ասաց Դանիելյանը։
Նա նաև նշեց, որ ներկայացված նախագծով առաջարկվում է վիրավորանքի համար սահմանել մինչև 2 մլն, զրպարտության համար` 3 մլն դրամ տուգանք։
«Ֆեյքերի ֆաբրիկաների» գործունեությունը կքրեականացվի. Ալեն Սիմոնյան
