ԵՐԵՎԱՆ, 10 փետրվարի - Sputnik. ԿԳՄՍ նախարար Վահրամ Դումանյանը վստահեցնում է` գիտական հիմնարկների հետ որևէ խնդիր չունեն` դեռ այդտեղ չեն հասել, որ խնդիրներ լինեն։ Դումանյանն այդ մասին հայտնեց ԱԺ–ում «Բարձրագույն կրթության և գիտության մասին» և կից ներկայացված օրենքների փաթեթի քննարկման ժամանակ` պատասխանելով ԲՀԿ–ական պատգամավոր Միքայել Մելքումյանի հարցին, թե ի՞նչ է լինելու Գիտությունների ազգային ակադեմիայի ինստիտուտների կարգավիճակը, որտեղ շուրջ 7000 մարդ է աշխատում։
«Օրենքի համաձայն` ԳԱԱ ինստիտուտները ստանում են առավել ինքնուրույնություն. դրանց խորհրդի կազմը 8 հոգանոց է` 4-ն ինստիտուտի գիտխորհուրդն է առաջադրում, մեկը` ակադեմիայի նախագահությունը, 3-ը` լիազոր մարմինը։ Ինստիտուտների նախագահությունը մնում է, սակայն այն վարչարարական և ֆինանսավորման գործերին չի միջամտում»,–ասաց նախարարը։
Անդրադառնալով ֆինանսավորման հարցին` Դումանյանը նշեց, որ այն լինելու է ուղիղ, ֆինանսավորումը տրամադրվելու է հենց ակադեմիային։ Նա ԱԺ պատգամավորներին դիմեց` ասելով, որ կուզեր եղած հնարավորությունների սահմանում գիտության ծախսային ֆինանսավորումն ավելացնել։
Ինչ վերաբերում է օրենքով սահմանված բուհերի ֆինանսավորման մեխանիզմին` Դումանյանը նշեց, որ նոր կարգով նախատեսվում է ոչ թե գումար տալ բուհերին պետպատվերի համար, այլ դրամաշնորհ տալ դիմորդին, ով էլ կորոշի, թե ո՞ր բուհն է ուզում ընդունվել։
Այսքան բուհ ունենալը «ճոխություն» է մեր փոքրիկ պետության համար. ինչ է առաջարկում նախարարը
Հիշեցնենք, որ ԿԳՄՍ նախկին նախարար Արայիկ Հարությունյանը նախորդ տարվա փետրվարի 24–ին ԱԺ-ում «Բարձրագույն կրթության և գիտության մասին» օրենքի քննարկման ժամանակ հայտարարել էր` Գիտությունների ազգային ակադեմիայի այն ինստիտուտները, որոնք անարդյունք են աշխատում, պիտի փակվեն։ Արդյունավետ աշխատող ինստիտուտներին պաշտոնյան խոստացել էր պետական աջակցություն, պետական պատվեր ու ֆինանսավորման ապահովում։
Սա բուռն քննարկումների և քննադատության տեղիք էր տվել։ Դրանից հետո ինստիտուտների ճակատագրի հարցը շատերին էր մտահոգում։
