ԵՐԵՎԱՆ, 9 փետրվարի – Sputnik. Ազգային ժողովի «Լուսավոր Հայաստան» խմբակցության անդամ Տարոն Սիմոնյանը այսօր հերթական նիստում խորհրդարանի նախագահ Արարատ Միրզոյանին հիշեցրեց, որ 4 տարի, 8 ամիս, 19 оր և 12 ժամ. սա այն ժամանակն է, որի ավարտից հետո Ադրբեջանի նախագահը կարող է եռակողմ հայտարարության հիման վրա պահանջել, որ ՌԴ-ն իր խաղաղապահ ուժերը դուրս բերի Արցախի տարածքից:
«Սա նաև այն ժամանակն է, որ մենք պետք է օգտագործենք նման հավանական զարգացումներին պատրաստ լինելու համար: Ես ուզում եմ հասկանալ` արդյո՞ք այս ժամանակը մենք արդյունավերտ օգտագործում ենք, թե՞ ոչ»,- Միրզոյանին հարց ուղղեց Սիմոնյանը՝ հավելելով, որ նիստի օրակարգում ընդգրկված 16 հարցերից և ոչ մեկը համարժեք չէ չէ Հայաստանի առջև կանգնած մարտահրավերներին:
ԱԺ նախագահը համաձայնեց մարտահրավերներին ադեկվատ արձագանքելու անհրաժեշտության մասին դիտարկմանը, բայց հավելեց, որ դրանով զբաղվում են ՀՀ-ի այլ ինստիտուտներ:
«Ձեր մատնանշած հարցը պետք է ուղղել վերաբերելի գերատեսչությունների ղեկավարներին: ԱԺ-ն իր զանազան գործընթացներով իր դերակատարումը ևս ունի, բայց բարեբախտաբար, թե դժբախտաբար ԱԺ այլ առօրյա պարտականությունները ոչ ոք չի չեղարկել: Մենք չենք կարող զբաղվել միայն մեկ հարցով»,- ասաց Միրզոյանը:
Նշենք, որ նիստի օրակարգում ընդգրկված հարցերի թվում են «Պետական սահմանի մասին» օրենքում լրացումներ կատարելու, Տեղական տուրքերի և վճարների մասին» օրենքում փոփոխություններ և լրացումներ կատարելու, «Տեղական ինքնակառավարման մասին» Հայաստանի Հանրապետության օրենքում լրացում կատարելու , «Երևան քաղաքում տեղական ինքնակառավարման մասին» Հայաստանի Հանրապետության օրենքում լրացում կատարելու, «Հանրային խորհրդի մասին» օրենքում փոփոխություն կատարելու, «Կրթության մասին» և «Բարձրագույն կրթության մասին» օրենքներում փոփոխություններ և լրացումներ կատարելու մասին և մի շարք այլ օրինագծերի փաթեթները, ինչպես նաև Վճռաբեկ դատարանի նախագահի ընտրություն հարցը:
Հիշեցնենք` 2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորակազմը՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով` 5 տարվա ժամանակահատվածով ավտոմատ երկարաձգմամբ, եթե կողմերից որևէ մեկը ժամկետի ավարտից 6 ամիս առաջ չհայտարարի այդ դրույթի կիրառումը դադարեցնելու մտադրության մասին:
Ղարաբաղում խաղաղապահ գործողության գինն ու վարկանիշը. թվերն ավելի քան խոսուն են
