Քաղցկեղը դատավճիռ չէ, եթե այն հայտնաբերվում է ժամանակին։ Sputnik Արմենիայի հետ զրույցում նման կարծիք հայտնեց ուռուցքաբան Արթուր Ավետիսյանը։
«Շատերը կարծում են, որ դա դատավճիռ է, այն ընկալում են որպես վատ ելքով լուր, այնինչ մեր շրջապատում շատ են մարդիկ, որոնք բուժվել են և շարունակում են ապրել մեր կողքին, իսկ մենք չգիտենք այդ մասին»,- ասաց նա։
Ամբողջ աշխարհին է հայտնի` որքան վաղ հայտնաբերեն քաղցկեղը, այնքան արդյունքը գոհացնող կլինի, ուշ հայտնաբերման դեպքում հակառակ պատկերն է լինելու։ Վատագույն սցենարից խուսափելու համար մասնագետը կարևորում է պետական ծրագրերի ներդրումը հատկապես այնպիսի հիվանդացությունների ուղղությամբ, որոնց վաղ հայտնաբերելիությունը զգալի նվազեցնում է մահացությունը։
«Խոսքը հաստ աղիքի, կրծքագեղձի, արգանդի պարանոցի քաղցկեղի մասին է։ Վաղ հայտնաբերումն ավելի մատչելի է դարձնում նաև ախտորոշված պացիենտին բուժելը, որովհետև բազմակոմպոնենտ բուժման եղանակներից կարող է ընտրվել մեկը, օրինակ, վիրահատություն, և ուրիշ միջամտության կամ թանկարժեք քիմիաթերապիայի կարիք չլինի»,- նշեց ուռուցքաբանը։
Ավետիսյանի խոսքով`կանանց շրջանում տարածվածության առումով առաջին տեղում կրծքագեղձի քաղցկեղն է, տղամարդկանց շրջանում` թոքի քաղցկեղը։ Տարվա կտրվածքով 6-8 տասնյակի հասնող դեպքեր ունենք։ Չնայած այս ամենին, ըստ մասնագետի, որոշ պաթոլոգիաների դեպքում Հայաստանում հիվանդացության մակարդակն ավելի ցածր է, քան աշխարհի մի շարք երկրներում։
Հիշեցնենք, որ փետրվարի 4-ն աշխարհում նշվում է որպես քաղցկեղի դեմ պայքարի միջազգային օր։
2020-2021 թվականների քարոզարշավի խորագիրն է. «Ես կամ և լինելու եմ»:
Ինչպես ժամանակին ախտորոշել թոքերի քաղցկեղը. բժիշկները «ոչ ստանդարտ» ախտանշան են գտել
