ԵՐԵՎԱՆ, 3 փետրվարի - Sputnik. Հայաստանի աշխատանքի և սոցիալական հարցերի նախարար Մեսրոպ Առաքելյանն այսօր խորհրդարանում հայտարարեց, որ Արցախի սոցիալական և հումանիտար խնդիրներն արդեն լուծվել են։
«Ես վստահեցնում եմ, որ Արցախում այս պահին ոչ մի սոցիալական և հումանիտար խնդիր չկա։ Դրա ամենակարևոր հաստատումն այն է, որ նոյեմբերի 10-ին Արցախում մնացել էին մի քանի հարյուր արցախցիներ, իսկ այսօր Արցախի բնակչությունը 100 հազարից ավելի է», - ասաց Առաքելյանը։
Նրա խոսքով՝ Արցախ են վերադարձել բոլոր այն քաղաքացիները, որոնք իրենց տունը չեն կորցրել պատերազմի հետևանքով։ Ադրբեջանին անցած տարածքների բնակիչներից էլ մոտ 5 հազարն են վերադարձել։
Նախարարի խոսքով՝ Արցախի՝ հայկական վերահսկողության տակ մնացած հատվածներում ամբողջությամբ վերականգնվել է գազամատակարարումը և էլեկտրամատակարարումը։ Ընդ որում` բջջային հեռախոսակապի օպերատորներից մեկը Արցախի տարածքում առանց ռոումինգի կապ է ապահովում Հայաստանի հետ։
«Հայաստանի կառավարությունը 15 մլրդ դրամի չափով ուղիղ աջակցություն է ցուցաբերել Արցախի բնակչությանը։ Այս աջակցությունը հնարավորություն է տալիս արցախցիներին լիովին բավարարել իրենց պահանջները։ Այժմ Արցախի կառավարության հետ իրականացվում են մի շարք ծրագրեր, որոնք զգալիորեն կփոխեն բնակիչների կյանքի որակը։ Մասնավորապես, հունվարից 6 ամսով ամբողջությամբ փոխհատուցվելու է արցախցիների եկամտահարկը», - նշեց Առաքելյանը:
Արցախի բյուջեի եկամուտները նվազել են 50 մլրդ դրամով։ Նախարարի խոսքով` այդ գումարը նույնպես կփոխհատուցվի Հայաստանից։ Արցախում չեն դադարել կենսաթոշակների, պետական կառույցների աշխատակիցների աշխատավարձերի վճարումները։
«Հայաստանը մնում է Արցախի սոցիալական անվտանգության երաշխավորը։ Եվ այս հարցում ոչ մի տարբերություն չկա Արցախի և Հայաստանի քաղաքացիների միջև», - շեշտեց Առաքելյանը։
2021-ի ապրիլի 1-ից Արցախում կգործի ինտեգրված սոցիալական ծառայությունների համակարգ, որի շնորհիվ արցախցիները կկարողանան բոլոր ծառայություններից օգտվել մեկ վայրում։
Հիշեցնենք, որ հունվարի 24-ին Մեսրոպ Առաքելյանն այցելել էր Ստեփանակերտ, որտեղ հանդիպել էր իր պաշտոնակից Մանե Թանդիլյանի և մի շարք այլ բարձրաստիճան պաշտոնյաների հետ: Նրանք քննարկել էին համատեղ իրականցվող և իրականացվելիք ծրագրերը։
