ԵՐԵՎԱՆ, 2 փետրվարի – Sputnik. Սիրիացի գրոհայինները պետք է լքեն Ղարաբաղյան հակամարտության գոտին։ Նման կարծիք է հայտնել ՀԱՊԿ գլխվար քարտուղար Ստանիսլավ Զասը առցանց ճեպազրույցի ժամանակ։
«Իհարկե, մենք տեղեկություններ ունեինք (թեկուզ ընդհանուր պլանի) Լեռնային Ղարաբաղի հակամարտության գոտում Սիրիայից գրոհայինների առկայության, ներկայության ու գործողությունների մասին։ Եվ դա գնահատել ենք որպես որոշակի ռիսկեր մեր երկրների, մեր դաշինքի համար»,-ասել է Զասը։
Ինչ վերաբերում է հարցին, թե ուր են գնացել այդ զինյալները, արդյո՞ք նրանք մնացել են այնտեղ, ապա նա դժվարանում է պատասխանել այդ հարցին: Իրավիճակի վերահսկողությունն իրականացվում է խաղաղարար ուժերի, Ադրբեջանի և Հայաստանի կողմից։
«Բայց մենք ելնում ենք այն հանգամանքից, որ վարձկաններն ու սիրիացի գրոհայինները պետք է լքեն այդ տարածքը, դադարեցնեն իրենց գործունեությունը։ Հավաքական անվտանգության պայմանագրի կազմակերպության անդամ երկրների անմիջական հարևանությամբ անօրինական զինված խմբավորումների, գրոհայինների խմբերի ստեղծումը որոշակի ռիսկեր է ներկայացնում մեր հավաքական անվտանգության համար»,-նշել է Զասը:
Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։ Նոյեմբերի 9-ին ՀՀ վարչապետ Նիկոլ Փաշինյանի, ՌԴ նախագահ Վլադիմիր Պուտինի ու Ադրբեջանի նախագահ Իլհամ Ալիևի միջև ստորագրված հայտարարության համաձայն` ռազմական գործողությունները դադարեցվեցին։
Ինչո՞ւ են ադրբեջանցիներն ուրախացել․ ռուսական խաղաղապահների հրամանատարի կենսագրությունը
Արցախի դեմ սանձազերծած պատերազմի առաջին իսկ օրերից հայտնի դարձավ, որ Թուրքիան Սիրիայի հյուսիսից վարձկաններ է ուղարկել Ադրբեջան՝ Արցախի ու Հայաստանի դեմ օգտագործելու նպատակով։ Այս տեղեկությունները հաստատել էր նաև ՌԴ Արտաքին հետախուզական ծառայության պետ Սերգեյ Նարիշկինը:
ՌԻԱ Նովոստին էլ տեղեկացրել էր, որ հոկտեմբերի 16-ին ավելի քան 1000 գրոհային է տեղափոխվել ղարաբաղյան հակամարտության գոտի։
Ձերբակալվել է Արցախի դեմ կռվող ահաբեկչական խմբավորման անդամներից մեկը
