ԵՐԵՎԱՆ, 2 փետրվարի – Sputnik. Հայտնի բռնցքամարտիկ, աշխարհի, Եվրոպայի ու ԽՍՀՄ չեմպիոն Իսրայել Հակոբկոխյանը երեկ սրտի կաթված է ստացել։ Տեղեկությունը հայտնում է փաստաբան Գոռ Սաղոյանը։
«Ապօրինի քաղաքական հետապնդման հետևանքները. Իսրայել Հակոբկոխյանը երեկ սրտի կաթված է ստացել. Փառք Աստծուն, հիմա ամեն ինչ կարգին է»,– Facebook-ի իր էջում գրել է նա։
Հիշեցնենք` դեկտեմբերի 28-ին մի քանի հարյուր քաղաքացիներ Երևանի Հանրապետության հրապարակում բողոքի ակցիա էին իրականացնում` պահանջելով ՀՀ վարչապետ Նիկոլ Փաշինյանի հրաժարականը։
Հետո կառավարության շենքի դիմաց բախումներ սկսվեցին շենքը պահպանող ոստիկանության աշխատակիցների ու քաղաքացիների միջև, երբ մի խումբ քաղաքացիներ փորձեցին մուտք գործել կառավարության շենք։
Դեպքի վայրից բերման ենթարկվեցին շուրջ 3 տասնյակ քաղաքացիներ, որոնք հետագայում ազատ արձակվեցին։ Իսկ հաջորդ օրը` հունվարի 29-ին, հայտնի դարձավ, որ Քննչական կոմիտեում քրեական գործ էր հարուցվել «մի խումբ անձանց կողմից նախնական համաձայնությամբ շենքեր, շինություններ զավթելու փորձ» հոդվածով:
Քրեական գործի շրջանակում ձերբակալվեցին Իսրայել Հակոբկոխյանը, ԱԺ նախկին պատգամավոր, «Վերադարձ» հիմնադրամի նախագահ Արագած Ախոյանը, «Հայոց ազգային գվարդիա» ՀԿ ղեկավար Արշակ Զաքարյանը, ՊՆ պահեստազորի փոխգնդապետ Տիգրան Չոբանյանը, «Կամք» հասարակական կազմակերպության հիմնադիր Վահագն Չախալյանը: Ավելի ուշ բոլորն ազատ արձակվեցին։
