ԵՐԵՎԱՆ, 30 հունվարի - Sputnik. Ռուսաստանյան խաղաղապահ անձնակազմի հրամանատարության ջանքերով հաջողվել է տուն վերադարձնել Հայաստանի 55 ու Ադրբեջանի 15 քաղաքացիների։ Այս մասին հայտարարել է Լեռնային Ղարաբաղում ռուսաստանյան խաղաղապահ առաքելության կենտրոնի պետի տեղակալ Դմիտրի Պերեպելկինը։
«Ռուսաստանյան խաղաղապահ անձնակազմի հրամանատարության ջանքերով հունվարի 28-ին տեղի է ունեցել գերիների հերթական փոխանակումը Հայաստանի ու Ադրբեջանի միջև։ Բաքու է վերադարձել 1 զինծառայող, Երևան՝ 5 քաղաքացի։ Ընդհանուր առմամբ հաջողվել է տուն վերադարձնել Հայաստանի 55 քաղաքացիների և 15 ադրբեջանցիների»,-ասել է Պերեպելկինը։
Հիշեցնենք, որ գերիների առաջին փոխանակումը տեղի էր ունեցել 2020-ի դեկտեմբերի 14-ին։
Հավելենք, որ արցախյան 44-օրյա պատերազմում հրադադար հաստատելուց ի վեր պաշտոնական տվյալներ չկան հայկական կողմի զոհերի, վիրավորների, գերիների ու անհետ կորածների թվի վերաբերյալ։
2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվել է Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորախումբը տեղակայմանը զուգահեռ դուրս են բերվում հայկական զինված ուժերը։ Ռուսաստանի Դաշնության խաղաղապահ զորակազմը տեղակայվում է 5 տարի ժամկետով` 5 տարվա ժամանակահատվածով ավտոմատ երկարաձգմամբ, եթե կողմերից որևէ մեկը ժամկետի ավարտից 6 ամիս առաջ չհայտարարի այդ դրույթի կիրառումը դադարեցնելու մտադրության մասին:
Ղարաբաղում խաղաղապահ գործողության գինն ու վարկանիշը. թվերն ավելի քան խոսուն են
