ԵՐԵՎԱՆ, 30 հունվարի – Sputnik. Հայաստանի, Ռուսաստանի և Ադրբեջանի փոխվարչապետներ Մհեր Գրիգորյանը, Ալեքսեյ Օվերչուկը և Շահին Մուստաֆան այսօր Մոսկվայում անցկացրել են եռակողմ աշխատանքային խմբի առաջին նիստը: Տեղեկությունը հայտնում է Ռուսաստանի կառավարության մամուլի ծառայությունը։
Նիստի ընթացքում քննարկվել են Ադրբեջանի նախագահի, Հայաստանի վարչապետի և ՌԴ նախագահի 2020 թվականի նոյեմբերի 9-ի հայտարարության 9-րդ կետի իրականացումից բխող համատեղ աշխատանքի հիմնական ուղղությունները, ինչպես նաև 2021 թվականի հունվարի 11-ի հայտարարության 2-րդ, 3-րդ, 4-րդ կետերը:
Կողմերը պայմանավորվել են ստեղծել հետևյալ փորձագիտական ենթախմբերը.
- երկաթուղային, ավտոմոբիլային և համակցված փոխադրումների գծով,
- փոխադրումների ապահովման հարցերով, այդ թվում ՝ անվտանգության, սահմանային, մաքսային, սանիտարական, անասնաբուժական, բուսասանիտարական և վերահսկողության այլ ձևեր։
Բացի այդ, կողմերը պայմանավորվել են մինչև 2021 թվականի փետրվարի 2-ն ավարտել փորձագիտական ենթախմբերի ձևավորումը և մինչև 2021 թվականի փետրվարի 5-ը անցկացնել դրանց առաջին նիստերը:
Եռակողմ աշխատանքային խմբի հաջորդ նիստը որոշվել է անցկացնել Մոսկվայում։ Համանախագահները հանդիպման օրը կհամաձայնեցնեն աշխատանքային կարգով:
Հիշեցնենք` հունվարի 11-ին ՀՀ վարչապետ Նիկոլ Փաշինյանի, Ռուսաստանի Դաշնության նախագահ Վլադիմիր Պուտինի և Ադրբեջանի նախագահ Իլհամ Ալիևի եռակողմ հանդիպման արդյունքներով ընդունվել էր հայտարարություն` որպես լրացում 2020թ–ի նոյեմբերի 9-ին ստորագրված հայտարարության։
Հունվարի 11-ի հայտարարության բոլոր 4 կետերը վերաբերում են նոյեմբերի 9-ի հայտարարության` տարածաշրջանում բոլոր տնտեսական և տրանսպորտային կապերն ապաշրջափակելու մասին 9-րդ կետին։
