ԵՐԵՎԱՆ, 29 հունվարի - Sputnik. Լրագրող Լիա Սարգսյանը, որի հետ երեկ Եռաբլուրում փոքր վեճի էր բռնվել ՀՀ վարչապետ Նիկոլ Փաշինյանը, կատարել է իր խոստումը և գրավոր հարց ուղղել վարչապետին: Նա այսօր կառավարության դիմաց էր եկել` Փաշինյանի ասածը պաստառին գրած։
«Շուշին հակամարտությունից և ազատագրումից առաջ ունեցել է 90 և ավելի տոկոս ադրբեջանցի բնակչություն։ Ուզում եք ասել, որ 90 տոկոս ադրբեջանցի բնակչություն ունեցող Շուշի քաղաքը հայկակա՞ն է իր այդ կարգավիճակով»,–Փաշինյանի` ԱԺ–ում հնչեցրած այս միտքն էր գրված նրա ձեռքի պաստառին։ Yerkir.am–ի լրագրող Լիա Սարգսյանը Փաշինյանից ակնկալում էր խոստացված պատասխանը։
Հիշեցնենք, որ հունվարի 28–ին «Եռաբլուր» զինվորական պանթեոնում լրագրողը Փաշինյանին հարցրել էր՝ ինքը Շուշին համարո՞ւմ է ադրբեջանական քաղաք։ Դա հունից հանել էր վարչապետին, և նա նշել էր, որ նման բան չի ասել։ Ավելին` պահանջել էր գրավոր ներկայացնել փաստեր, թե ինքը Շուշին ադրբեջանական քաղաք է համարել, և խոստացել էր պատասխանել ուղիղ եթերով։
Լրագրող Լիա Սարգսյանն այսօր մի կարճ ժամանակ կանգնեց կառավարության շենքի դիմաց, հետո հայտնվեցին Փաշինյանի կողմնակիցները, որոնք խլեցին նրա պաստառն ու պատռեցին այն։
Նշենք, որ հունվարի 21-ին Հայաստանի վարչապետ Նիկոլ Փաշինյանը, ելույթ ունենալով խորհրդարանում, ասել էր, որ Ղարաբաղյան հակամարտության կարգավորման ողջ ընթացքում ադրբեջանական բնակչությանը Շուշի վերադարձնելու հարցը օրակարգում է եղել: Շուշիի բնակչությունը մինչև առաջին արցախյան պատերազմը, ըստ Փաշինյանի, 90 տոկոսով ադրբեջանցիներից էր կազմված։ Ելնելով դրանից ՝ վարչապետը հարց էր տալիս՝ Շուշին այդ կարգավիճակով հայկակա՞ն քաղաք էր։
Շուշիի թեմայով շահարկումները տնային տնտեսուհիների համար են. Ալեն Սիմոնյան
