Հետպատերազմական Հայաստանում բոլորս ենք պարտվել` իշխանությունը, ընդդիմությունը, Հայաստանում և դրսում բնակվող յուրաքանչյուր հայ։ Իշխանությունը պարտվել է նախընտրական փուլում բերած ծրագրի իրականացման, ընդդիմությունը` իշխանափոխության գործընթացը տապալելու հարցում, իսկ 10 միլիոն հայերը պարտվել են իշխանություններին, որոնց հավատացին 2018-ին։ Sputnik Արմենիայի հետ զրույցում նման կարծիք հայտնեց «Մարդկային զարգացման միջազգային կենտրոնի» ղեկավար Թևան Պողոսյանը։
«Հեղափոխության արդյունքում ձևավորված ազգային երազանքը կյանքի չի կոչվել, տնտեսությունը փլուզված է, երկիրը ճգնաժամի մեջ է, որևէ պետական ինստիտուտ չի աշխատում, գերիները չեն վերադարձվել, նշանակում է` բոլորս ենք պարտվել»,-ասաց նա։
Պողոսյանի խոսքով` արցախա-ադրբեջանական պատերազմի հետևանքով ստորագրված կապիտուլյացիան է պատճառը, որ Ալիևը հանդես է գալիս ցինիկ պահվածքով, հայ ժողովրդի վրա մատ է թափ տալիս, իսկ թիվ մեկ պատասխանատուն եղել և մնում է գործող իշխանությունը։
Արտաքին քաղաքականության մեջ շտկումներ կլինեն. նախարարն ասաց` ինչն են հաշվի առնելու
«Պատերազմը մեծագույնս իշխանության վրա է, որը պետք է օրենքի համաձայն զինակոչ աներ, մոբիլիզացիան իրականացներ, հրամաններ տար, ընդդիմությունն էլ այդ ժամանակ լծակներ չուներ, ընդամենը կարող էր կամավոր մասնակցություն ցուցաբերել»,- նշեց «Մարդկային զարգացման միջազգային կենտրոնի» ղեկավարը։
Ըստ նրա` այս իրավիճակում պետք է առաջնորդվել ոչ թե հասարակությանը ընդդիմության-իշխանության բաժանելով, այլ ամբողջ ազգին համախմբելով։
«Պետք է գիտակցենք, որ կողքի հայի ցավը իմ ցավն է, որ կողքի հայն այն մարդն է, որի հետ ուս ուսի տված հայրենիք պետք է կառուցենք ու պաշտպանենք, որ թշնամին բոլորիս թշնամին է, ոչ թե միմյանց քննադատենք, այլ մտածենք` ինչպես ենք այս ճգնաժամերը հաղթահարում»,- ընդգծեց Պողոսյանը։
Նա հիշեցրեց, որ այդ մասին է նաև ՀՀ նախագահ Արմեն Սարգսյանի «Դեպի «Չորրորդ Հանրապետություն»» հոդվածը:
«Այս կետից սկսած` կարող ենք գործնական քայլերի գնալ». Ավինյանը` արտահերթ ընտրության մասին
