ԵՐԵՎԱՆ, 20 հունվարի – Sputnik. Հայկական կողմը դիվանագիտական խողովակներով ի ցույց է դնում աշխարհին, որ Ադրբեջանը պատրաստ չէ խաղաղության։ ԱԺ–ում կառավարության հետ հարցուպատասխանի ժամանակ նման կարծիք հայտնեց ՀՀ արտգործնախարար Արա Այվազյանը` պատասխանելով «Իմ քայլը» խմբակցության պատգամավոր Տաթևիկ Հայրապետյանի հարցին։
Հայրապետյանն ասաց, որ այսօր տեղեկություն է ստացել, որ երբ ՄԻԵԴ–ը միջանկյալ միջոց է կիրառել մեր ռազմագերիներից մեկի հետ կապված, այդ որոշումից հետո անգամ ադրբեջանական կողմը զրկել է մեր գերուն կյանքի իրավունքից։ Ի պատասխան Այվազյանն ասաց, որ գերիների վերադարձի հարցն առաջնային խնդիրներից մեկն է։
«Ձեր նշած ողբերգությունը ևս մեկ անգամ ի ցույց է դնում, որ Ադրբեջանը կեղծ օրակարգ է առաջ տանում` տարածաշրջանում խաղաղության, զարգացման և հաշտության առնչությամբ»,–ասաց Այվազյանը։
Նրա խոսքով` խաղաղության մասին խոսելու համար նախ անհրաժեշտ է ստեղծել համապատասխան մթնոլորտ։ Այվազյանը հավելեց նաև, որ վստահության վերականգման ուղղությամբ պետք է քայլեր արվեն, սակայն առ այսօր նման քայլեր չենք տեսել ադրբեջանական կողմից։
Հիշեցնենք, որ Արցախյան ռազմաճակատում հրադադար հաստատվելուց հետո առայսօր պաշտոնական տվյալներ չկան հայկական կողմի զոհերի, վիրավորների, գերիների ու անհետ կորածների թվի վերաբերյալ։
«Համակարտությունը մտել է մի նոր փուլ». Այվազյանն անդրադարձել է Ալիևի հայտարարություններին
Ոչ պաշտոնական աղբյուրները նշում են առնվազն 5 հազար զոհի, ավելի քան 10 հազար վիրավորի, հարյուրից ավելի գերիների մասին։
