ԵՐԵՎԱՆ, 19 հունվարի - Sputnik. Դեղերի շուկայում վերջին շրջանում թանկացումներ են արձանագրվել`մասնավորապես, սրտանոթային, ճնշում իջեցնող դեղերի դեպքում։ Դեղատներից փորձեցինք հետաքրքրվել, թե մեծ պահանջարկ վայելող վերոհիշյալ դեղերի գները որքանով են աճել։
Հայաստանն ու Իրանը մտադիր են դեղերի և բժշկական սարքերի միասնական արտադրություն սկսել
Պարզվեց, որ թանկացել է «Կարդիո մագնիլը» (75 մգ), որի մեկ հատը 21 դրամի փոխարեն այժմ 24 դրամ է, «Տրիպլիկսամի» մեկ հատիկը 235 դրամից թանկացել է՝ դառնալով 250 դրամ, «Կոնկորի» 5մգ մեկ դեղահատիկի արժեքը 58 դրամից դարձել է 75 դրամ... Դեղերի մեկ տուփի մեջ 200-300 դրամի թանկացում է գրանցվել։
Ազգային վիճակագրական կոմիտեից տեղեկանում ենք, որ ոչ պարենային ապրանքների շուկայում 2020թ. դեկտեմբերին, 2019-ի դեկտեմբերի համեմատ, արձանագրվել է 3.4%, իսկ 2020թ. նոյեմբերի համեմատ՝ 2.3% գնաճ: Ինչ վերաբերում է դեղերի շուկային, ապա 2020թ. դեկտեմբերին, նոյեմբերի համեմատ, դեղագործական ապրանքների 3.2 տոկոս թանկացում է եղել։
ՀՀ միջազգային դեղարտադրողների ասոցիացիայի նախագահ Սամվել Զաքարյանը Sputnik Արմենիայի հետ զրույցում նշեց, որ դեղերի շուկայում թանկացումները պայմանավորված են 2 գործոնով։
«Դեղերի թանկացման պատճառը, մի կողմից, դոլարի և եվրոյի կուրսի բարձրացումն է, մյուս կողմից, այն պայմանավորված է նաև անհրաժեշտ պաշարների սպառմամբ։ Այսինքն` յուրաքանչյուր տարեվերջին, երբ դեղերի տարեկան պաշարները վերջանում են կամ պակասում, մինչև դեղերի նոր խմբաքանակ ներմուծելը, թանկացումներ են լինում»,–ասաց Զաքարյանը։
Նրա խոսքով` որոշ տնտեսվարողներ փորձում են մաքսիմում օգուտ ստանալ ստեղծված իրավիճակից` դեղերի գները բարձրացնելով։
Բացի այդ, ըստ Զաքարյանի, Հայաստանում առհասարակ դեղերի գինը բարձր է, քանի որ տարածաշրջանում և ԱՊՀ երկրներում միակ երկիրն ենք, որտեղ դեղ իրացնողները 20 տոկոս ԱԱՀ են վճարում, և հենց այդ իսկ պատճառով էլ մեզ մոտ դեղերն ավելի թանկ են։ Հարևան Ռուսաստանում, օրինակ, տարիներ առաջ են ԱԱՀ–ն ավելացրել, սակայն այնտեղ 8 տոկոս է այն։
Զաքարյանը նշում է` եթե պետությունն ԱԱՀ–ն հանի դեղերի իրացման շուկայից, ապա դրանք առնվազն 20 տոկոսով կէժանանան բնակչության համար։ Ի դեպ, ըստ Զաքարյանի, այդ ԱԱՀ–ով պետբյուջե տարեկան 16 մլն դրամի չափ գումար է մտնում, ինչն այնքան էլ շատ չէ պետության համար, սակայն քաղաքացիների համար դեղերի գնի` 20 տոկոս նվազումն էական կարող է լինել։
«Ժամանակին` 2017-ին, «Ելք» խմբակցությունը նախագիծ էր ներկայացրել ԱԺ, որպեսզի դեղ իրացնողներն ազատվեն 20 տոկոս ԱԱՀ վճարելուց։ Նախագիծն այն ժամանակ մերժվեց։ Սակայն իշխանություն գալուց հետո, երբ մենք էլ անընդհատ հիշեցնում ենք այդ մասին, նրանք միայն լռում են, և այդ մասին խոսք չկա»,–ասաց Զաքարյանը։
Նա դեղերի շուկայում առկա ևս մեկ խնդիր նշեց`Հայաստանի շուկան փոքր է, և կան ընկերություններ, որ չեն ուզում մեր շուկա մտնել, իսկ մտնելիս էլ դեղի արժեքը բարձր են դնում, քանի որ գիտեն, որ հասանելիության համար պատրաստ են վճարել այդ գինը։
Զաքարյանն ամեն դեպքում հույս ունի, որ առաջիկայում` 1-2 ամսվա ընթացքում դեղերի գները կիջնեն։ Այսինքն` անհրաժեշտ խմբաքանակը կստանանք։
ՀՀ տնտեսական մրցակցության պետական հանձնաժողովից էլ տեղեկացրին, որ դեղերի շուկայի ոլորտում ուսումնասիրություն են իրականացնում։ Այն ավարտելուց հետո արդյունքները կհրապարակեն։
Նոր լաբորատորիա Հայաստանում. վարակների դեմ դեղերի ուսումնասիրությունն ընդլայնվում է
