ԵՐԵՎԱՆ, 19 հունվարի – Sputnik. Մարտակերտի դիտորդական դիրքերում ծառայություն իրականացնող ռուս խաղաղապահները մշակում են հրադադարի խախտման դեպքում իրենց գործողությունները: Տեղեկությունը հայտնում է Ռուսաստանի պաշտպանական գերատեսչությունը։
Ռուս խաղաղապահներն իրավիճակի շուրջօրյա մոնիտորինգ և վերահսկողություն են իրականացնում։ Ամեն օր նրանց դիտակետերի անձնակազմի հետ անցկացվում են պարապմունքներ, որպեսզի նրանք պատրաստ լինեն հրադադարի ռեժիմի խախտման դեպքերին, ինչպես նաև դիտակետերի վրա հնարավոր հարձակումներին։
Ըստ հաղորդագրության` պարապմունքների արդյունքում խաղաղապահներն իրենց գործողությունները հասցնում են ավտոմատացման։
![Մարտակերտում խաղաղապահները մշակում են հրադադարի խախտման դեպքում իրենց գործողությունները Մարտակերտում խաղաղապահները մշակում են հրադադարի խախտման դեպքում իրենց գործողությունները - Sputnik Արմենիա](https://cdn.am.sputniknews.ru/img/07e5/01/13/26139514_0:0:1280:720_600x0_80_0_0_8813e72f396f7b9511157584e665e330.jpg)
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվել է Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորախումբը տեղակայմանը զուգահեռ դուրս են բերվում հայկական զինված ուժերը։ Ռուսաստանի Դաշնության խաղաղապահ զորակազմը տեղակայվում է 5 տարի ժամկետով` 5 տարվա ժամանակահատվածով ավտոմատ երկարաձգմամբ, եթե կողմերից որևէ մեկը ժամկետի ավարտից 6 ամիս առաջ չհայտարարի այդ դրույթի կիրառումը դադարեցնելու մտադրության մասին: