ԵՐԵՎԱՆ, 18 հունվարի – Sputnik. ԱՄՆ Կալիֆոռնիա նահանգի համաճարակաբան Էրիկա Պանը կոչ է արել դադարեցնել «Moderna» ընկերության կորոնավիրուսի դեմ պատվաստանյութի խմբաքանակներից մեկի բաշխումը։ Պատճառը հնարավոր ալերգիկ ռեակցիաներն են։ Տեղեկությունը հայտնում է առողջապահության տեղական դեպարտամենտը։
Նշվում է, որ «Moderna» դեղամիջոցը Կալիֆոռնիա է մատակարարվել հունվարի 5-ից 12-ն ընկած ժամանակահատվածում։ Այդ խմբաքանակից ավելի քան 330 հազար չափաբաժինը բաշխվել է նահանգի 287 մատակարարների միջև:
««Moderna» պատվաստանյութի որոշակի խմբաքանակի ներարկումից հետո հիվանդանոցներից մեկում սովորականից շատ հնարավոր ալերգիկ դեպքեր են արձանագրվել։ 24 ժամվա ընթացքում մոտ 10 մարդ բժշկական օգնության կարիք են ունեցել»,-հայտարարել է Էրիկա Պանը։
Թե կոնկրետ ինչպիսի ալերգիկ ռեակցիաներ են դիտարկվել բուժառուների մոտ, չի նշվում։
Իսրայելում «Pfizer» պատվաստանյութի ներարկումից հետո 13 մարդ դիմային կաթված են ստացել
Համապատասխան տեղեկությունն այժմ ուսումնասիրում են Հիվանդությունների վերահսկման և կանխարգելման կենտրոնը (CDC), Պարենի և դեղորայքի որակի սանիտարական վերահսկողության վարչությունը (FDօA), ինչպես նաև արտադրող ընկերությունը:
Պուտինն ասել է, որ կորոնավիրուսի դեմ ռուսական պատվաստանյութն ամենալավն է աշխարհում
«Ծայրահեղ զգուշությունից ելնելով` մենք խորհուրդ ենք տալիս, որ մատակարարներն օգտագործեն պատվաստանյութերի մյուս հասանելի պաշարները և դադարեցնեն 041L20A խմբաքանակի ներարկումը, մինչև CDC-ի, FDA-ի և «Moderna» ընկերության քննության ավարտը»,-ասել է համաճարակաբանը։
Նշենք, որ ՀՀ առողջապահության նախարարությունը նույնպես բանակցություններ է վարում ամերիկյան «Moderna» ընկերության հետ, որի հիմնադիրը հայազգի գործարար Նուբար Աֆեյանն է։
