ԵՐԵՎԱՆ, 16 հունվարի - Sputnik. ՀՀ իրացման շուկայի համար արտադրվող «Կոկա-Կոլայի» վրա ադրբեջաներեն տեքստ չկա։
«Կոկա-Կոլա Հելլենիկ Բոթլինգ Քամփնի Արմենիա» ՓԲԸ-ն պաշտոնական հաղորդագրություն է տարածել՝ անդրադառնալով վերջին օրերին համացանցում աղմուկ բարձրացրած դեպքին։ Հիշեցնենք՝ սոցիալական ցանցերում տեղեկություններ էին տարածվել, թե ընկերության արտադրանքը հայկական շուկայում վաճառվում է ադրբեջաներեն մակնշմամբ։
«Մեր ընկերության կողմից հայաստանյան շուկայում իրացման նպատակով արտադրվող կամ ներմուծվող ցանկացած ապրանքատեսակի փաթեթավորումը անցնում է վերանայման տարբեր փուլեր և խիստ համապատասխանում է ՀՀ և ԵԱՏՄ կիրառելի կարգավորումներին, փաթեթավորման վրա առկա են տվյալ կարգավորումներով պահանջվող լեզուներով սահմանված տեքստեր՝ հայերեն/ռուսերեն։ Որևէ փաթեթավորում չի պարունակում ադրբեջաներեն տեքստ, արտադրանքը համապատասխանում է որակի և անվտանգության միջազգային և տեղական պահանջներին»,- նշված է ընկերության պաշտոնական պարզաբանման մեջ։
Ինչ վերաբերում է ադրբեջաներեն մակնշմամբ ըմպելիքներին, ապա ընկերության տեղեկացմամբ՝ այդ ապրանքատեսակը ՀՀ չի ներմուծվել։ Այն հանրապետության տարածքում իրացման համար արտոնված չէ ընկերության կողմից։
Նշենք, որ աղմուկ բարձրացրած արտադրանքին անդրադարձել է Սննդամթերքի անվտանգության տեսչությունը։ ՍԱՏՄ պնդմամբ՝ «աղմկահարույց» «Կոկա-կոլան» ոչ թե արտադրված է Ադրբեջանում, այլ արտադրված է Ադրբեջանի ու Վրաստանի շուկաների համար։
Նախարարն ասել է` որ դեպքում չի երկարաձգվի թուրքական ապրանքների ներմուծման արգելքը
Խնդրին անդրադարձել էր նաև ՀՀ էկոնոմիկայի նախարար Վահան Քերոբյանը։ Մասնավորաբար, նա ասել էր, որ տասնյակ տարիներ Հայաստանի շուկայում եղել են ապրանքներ, որոնց վրա եղել է թուրքական և ադրբեջանական մակնշում, «եղել են բազմաթիվ թուրքական ապրանքներ, և դա այն ժամանակ համարվել է նորմալ»: Նրա խոսքով՝ եթե «հիմա պնդենք, որ «Սանդորան» կամ «Կոկա Կոլան» մեզ վաճառեն ապրանք, որոնց վրա չկա ադրբեջաներեն մակնշում, այդ ժամանակ գնաճը կբարձրանա և կդառնա 10 տոկոս»։ Իր կանխատեսումը նախարարը հիմնավորել էր նրանով, որ այդ դեպքում ընկերությունները պետք է փող ծախսեն և դա մտցնեն իրենց ապրանքի գնի մեջ:
