ԵՐԵՎԱՆ, 12 հունվարի – Sputnik. ՀՀ ազգային անվտանգության ծառայության նախկին տնօրեն Գեորգի Կուտոյանի մահվան դեպքի առթիվ հարուցված քրեական գործի նախաքննությունը կասեցվել է: Տեղեկությունը Sputnik Արմենիային հայտնեցին Քննչական կոմիտեից։
«Քրեական գործի նախաքննությունը կասեցվել է Քրեական դատավարության օրենսգրքի 31-րդ հոդվածի 1-ին մասի 1-ին կետով (հայտնի չէ անձը, որը գործով պետք է ներգրավվի որպես մեղադրյալ)»,– ասաց ՔԿ տեղեկատվության և հասարակայնության հետ կապերի բաժնի պետ Ռիմա Եգանյանը։
Հիշեցնենք` 2020–ի հունվարի 17-ին Երևանի Պարույր Սևակի փողոցի իր բնակարանում հայտնաբերվել էր ԱԱԾ նախկին տնօրեն Գեորգի Կուտոյանի դին՝ հրազենային վիրավորումով։ Հարուցվել էր քրեական գործը Քրեական օրենսգրքի 110-րդ հոդվածի 1-ին մասով՝ (ինքնասպանության հասցնելը)։
Գեորգի Կուտոյանը 39 տարեկան էր։ ՀՀ ԱԱԾ–ն նա ղեկավարել էր 2016թ. փետրվարի 12-ից մինչև 2018թ. մայիսի 10-ը։
