ԵՐԵՎԱՆ, 12 հունվարի – Sputnik. WhatsApp, Signal և Telegram մեսենջերները համեմատաբար անվտանգ են, բոլոր երեք հավելվածներում միջանցիկ գաղտնագրում եմ կիրառում և նամակագրության բովանդակությունը կոնֆիդենցիալ է մնում, սակայն այս մեսենջերներից մի քանիսը հավաքում են օգտատերերի տվյալներ, որոնք կարող են փոխանցել երրորդ անձանց։ Այս մասին պատմել են ՌԻԱ Նովոստիի կողմից հարցված փորձագետները։
WhatsApp–ն ավելի վաղ թարմացրել է օգտվելու կանոնները` ավելացնելով Facebook կորպորացիային անձնական տվյալների փոխանցման մասին կետը։ Դրանից հետո Sensor Tower ընկերությունը տվյալներ էր հրապարակել, որոնց համաձայն` WhatsApp–ի թարմացումից հետո մյուս` Signal և Telegram մեսենջերների օգտատերերի թիվը կտրուկ աճեց։
«Ինչպես հայտարարում են բոլոր երեք մեսենջերների մշակողները, օգտատերերի նամակագրությանը հասանելիություն նրանք չեն ստանում, քանի որ ամենուր միջանցիկ գաղտնագրում է կիրառվում, այսինքն փոխանցվող տեղեկությունը պետք է անհասանելի լինի կողմնակի անձանց համար։ Սակայն պետք չէ բացառել արտադրողի կողմից երրորդ անձանց բանալիների օրինական փոխանցման հավանականությունը», – ՌԻԱ Նովոստիի հետ զրույցում ասել է Cross Technologies մշակման դեպարտամենտի ղեկավար Ալեքսանդր Տյուրնիկովը։
Բջջային հավելվածի միջոցով հնարավոր կլինի պարզել՝ կորոնավիրուսով վարակված եք, թե ոչ
Նա պարզաբանեց, որ Signal–ն առավելություն ունի բաց կոդի տեսքով, որտեղ յուրաքանչյուր ցանկացող կարող է ստուգել այն բեքդորների (ալգորիթմների դեֆեկտներ, որոնք թույլ են տալիս անօրինական հասանելիություն ստանալ օգտատերերի տվյալների նկատմամբ, – խմբ.) առկայության վրա, այսինքն Signal–ը օգտատերերի մասին նվազագույն տեղեկություն է հավաքում, ինչը չի կարելի ասել Telegram–ի և առավել ևս` WhatsApp–ի մասին։
«Այնպես որ, եթե խոսենք անվտանգության մասին, ապա նախընտրելի կլինի Signal–ը։ Telegram–ը պակաս անվտանգ է պարզապես լրացուցիչ որոշակի տեղեկատվությանը հասանելիություն ստանալու հնարավորության առումով։ WhatsApp–ը տվյալ դեպքում առավել շատ հարցեր է առաջացնում», – հավելել է Տյուրնիկովը։
«Կասպերսկի լաբորատորիայից» բջջային սպառնալիքների ուսումնասիրող Վիկտոր Չեբիշևը ևս կարծում է, որ այսօրվա դրությամբ հայտնի բոլոր մեսենջերները համեմատաբար անվտանգ են շնորհիվ գաղտնագրման համակարգերի։
«Սակայն պետք է հիշել, որ օգտատերը կարող է բախվել հարձակման և սարքի վարակման փորձերի։ Այդ պատճառով Android–ի դեպքում իրավիճակը փոքր–ինչ այլ է. օգտատերերը պետք է ուշադիր լինեն։ Այստեղ, օրինակ ներկառուցված Accessibility Service ծառայություն կա։ Հայտնի է, որ չարագործները շահագործում էին այդ ծառայության հնարավորությունները` օգտատերերի տվյալները հավաքելու համար։ Մասնավորապես, անցած տարի մենք ստալկերյան լրտես ծրագիր հայտնաբերեցինք, որը կարող էր մեսենջերներից ստանալ մուտքային և ելքային հաղորդագրությունների տեքստերը` կիրառելով այդ սովորական ֆունկցիան», – պատմել է նա։
Փորձագետը բջջային սարքերի օգտատերերին խորհուրդ է տալիս հետևել մի շարք կանոնների։
Ըստ նրա` պետք չէ մեսենջերներն ու այլ ծրագրերը ներբեռնել կողմնակի աղբյուրներից` օգտագործելով միայն հավելվածների համար նախատեսված պաշտոնական խանութները։
Նոր հավելված, «որն ամեն ինչ գիտի» հայկական ֆուտբոլի մասին. մանրամասնում է համահեղինակը
«Հնարավորության սահմաններում պետք է ծանոթանալ օգտվողի համաձայնագրից։ Լինում են իրավիճակներ, երբ ծրագրի ստեղծողը բացահայտ նախազգուշացնում է այն մասին, որ կարող է երրորդ կողմին փոխանցել օգտատիրոջ տվյալները։ Մի անցեք կասկածելի հղումներով, նույնիսկ եթե դրանք ձեզ ծանոթ մարդիկ են ուղարկել», – խորհուրդ է տալիս նա։
Բացի այդ, փորձագետը պաշտպանական լուծումներ է խորհուրդ տալիս այն բջջային սարքերի վրա, որոնց դեպքում դա հնարավոր է։ Մասնավորապես պետք է ուշադրություն դարձնել, ինչ թույլտվություններ է հայցում ներբեռնած հավելվածը։
Նոր հավելվածի միջոցով հնարավոր է դառնալ Դի Կապրիո և ոչ միայն․ տեսանյութ
