ԵՐԵՎԱՆ, 11 հունվարի – Sputnik. Հայաստանյան տոների օրացույցում այսուհետ կավելանա ևս մեկը՝ ազգային փոքրամասնությունների օրը։ Ազգային ժողովի մարդու իրավունքների պաշտպանության և հանրային հարցերի մշտական հանձնաժողովը դրական եզրակացություն տվեց Հայաստանի Հանրապետության տոների և հիշատակի օրերի մասին օրենքում լրացում կատարելուն։ Ըստ ավելացված կետի՝ ամեն տարվա սեպտեմբեր ամսվա վերջին շաբաթ օրը նշվելու է որպես ազգային փոքրամասնությունների օր։
ԿԳՄՍ նախարարի տեղակալ Արայիկ Խզմալյանն օրենքի նախագիծը ներկայացնելիս ասաց, որ կառավարությունն ամեն կերպ սատարում է ազգային փոքրամասնությունների մշակույթի տարածմանը, կիրառում տարբեր դրամաշնորհային ծրագրեր։
«Տոնի շնորհիվ ավելի շատ իրադարձություններ կկազմակերպվեն, տոնը կնպաստի մշակույթների և ժողովուրդների փոխադարձ ճանաչմանը և առավել լավ ընկալմանը», - ասաց նա։
Օրենքի նախագիծն ընդունվեց միաձայն։ ԱԺ–ում այն հաստըատվելու դեպքում 2021-ի սեպտեմբերի 25-ին առաջին անգամ Հայաստանում կնշվի այդ տոնը՝ Ազգային փոքրամասնությունների օրը։
Ազգային փոքրամասնությունների համար երաշխիքներ ապահովելու քայլ է. Սանդիկովը` օրենքի մասին
Հայաստանում հիմնական էթնիկ փոքրամասնություններն են եզդիները (մոտ 35 հազար մարդ), ռուսները (մոտ 11 հազար), ասորիները (մոտ 3 հազար) և քրդերը (մոտ 2 հազար)։ Այս չորս ժողովուրդները ունեն իրենց ներկայացնող պատգամավոր ՀՀ ԱԺ-ում։
Երկրում կան նաև ավելի փոքր՝ հազար մարդուց քիչ բաղկացած համայնքներ՝ ուկրաինացիների, հույների, վրացիների, բելառուսների, հրեաների, լեհերի և գերմանացիների։
Հայաստանում կամրագրեն ազգային փոքրամասնությունների իրավունքները
