ԵՐԵՎԱՆ, 9 հունվարի – Sputnik. Արարատի մարզում այսօր ողբերգական ավտովթար է տեղի ունեցել. Opel Zafira–ն մոտ 100 մետր գլորվելով` հայտնվել է դաշտում։ Վթարի հետևանքով կա 1 զոհ, 2 վիրավոր։ Տեղեկությունը հայտնում է shamshyan.com–ը։
«Այսօր ժամը 17:30-ից 18:00-ն ընկած ժամանակահատվածում Opel Zafira մակնիշի մեքենայի վարորդը Լանջանիստ գյուղի վարչական տարածքում՝ ժողովրդին հայտնի «Լանջանիստի ոլորաններում», դեռևս անհայտ հանգամանքներում դուրս է եկել ճանապարհի երթևեկելի գոտուց և 100 մետր գլորվելով` հայտնվել դաշտում: Վթարի հետևանքով 3 հոգի մարմնական վնասվածքներով տեղափոխվել են Վեդու հիվանդանոց»,–գրում է կայքը։
Մինչ քննիչները դեպքի վայրում տեղազննություն են կատարել, հիվանդանոցից ահազանգ է ստացվել, որ վիրավորներից մեկը ճանապարհին մահացել է:
Ավելացել են վթարները, որոնք տեղի են ունենում հանդիպակաց գոտի դուրս գալու պատճառով
Փաստի առթիվ ՀՀ քրեական օրենսգրքի 242 հոդվածի 2-րդ մասի հատկանիշներով (ճանապարհային երթևեկության և տրանսպորտային միջոցների շահագործման կանոնները խախտելը, որն անզգուշությամբ առաջացրել է մարդու մահ) հարուցվել է քրեական գործ:
Ոստիկանությունն ու քննչական բաժինը պարզում են վարորդի, մահացածի և վիրավորների ինքնությունը:
