Հայաստանյան բոլոր եկեղեցիներում այսօր երեկոյան մատուցվել է Ճրագալույցի սուրբ պատարագ:
Սուրբծննդյան տոնը Հայ Առաքելական եկեղեցու տոնացույցով սկսվում է հունվարի 5-ի երեկոյան և շարունակվում կեսգիշերից հետո, քանի որ եկեղեցական կանոնով նոր օրը սկսվում է նախորդ օրվա երեկոյից՝ ժամերգությունից հետո:
Այս խորհրդով Սուրբծննդյան Ճրագալույցի սուրբ պատարագի ընթացքում եկեղեցին հավատացյալներին ավետում է. «Քրիստոս ծնավ և հայտնեցաւ»:
Ճրագալույցի պատարագի ընթացքում հատուկ արարողակարգով վառվում են տաճարի ջահերն ու կանթեղները: Քահանաները, խնկարկելով և «Ուրախացի՛ր, սրբուհի» շարականի երգեցողությամբ սկսում են օրհնաբանել Աստվածամայր Կույսին՝ հայտնելով Քրիստոսի գալուստը:
Պատարագի ավարտին մարդիկ եկեղեցում վառած ճրագները դուրս են հանում եկեղեցուց և տանում են տուն՝ այս կերպ տարածելով, Աստծո լույսը, օրհնությունը:
Վաղն առավոտյան հայաստանյան բոլոր առաքելական եկեղեցիներում կանցկացվեն Սուրբծննդյան պատարագներ:
