Հարություն Մեսրոբյանի դիտարկմամբ`հայերիս վրա նահանջ տարիները լավ չեն գալիս, օրինակ` 1988 թվական` երկրաշարժ և Սումգայիթ, 1996, 2008 թվականներ` ներքաղաքական ալեկոծումներ, 1992, 2016, 2020 թվականներ` պատերազմ, և պարզ է, որ ժողովրդի մոտ էլ ավանդաբար նահանջ տարվա նկատմամբ կա վերապահում, որովհետև այդ տարիներին տեղի են ունեցել ամենաողբերգական դեպքերը։
«Ես շնորհակալ եմ այսպես կոչված նոր իշխանություններին, որովհետև 2018 թվականից մինչ օրս փայլուն կերպով ցույց տվեցին, թե իրականում մենք ով ենք և մեր պետությունն իրենից ինչ է ներկայացնում։ Տեսանք բոլոր կեղծավոր շղարշները, ավանդապաշտական, ազգային մոտեցումները, տեսանք, որ մեր արժեքն իջել է, ու այն շատերի մոտ գտնվում է նույնիսկ շրիշակից ցածր մակարդակի վրա»,– Sputnik Արմենիային ասաց Հանրային խորհրդի նախկին անդամը։
Համեմատելով 1988 թվականի հասարակությանն այսօրվանի հետ` Մեսրոբյանն ընդգծեց ահռելի տարբերությունը և ավելացրեց` համեմատությունը պարկեշտ խոսքերի մեջ չի տեղավորվի։ Նրա համոզմամբ` մեր երկրում այժմ տիրում է լայնածավալ կեղծավորություն և անպատասխանատվություն։
Իրավիճակից դուրս գալու ելքերից մեկը, ըստ Մեսրոբյանի, Հայաստանում պրոֆեսիոնալ և պետական մտածելակերպով օժտված կառավարիչների էլիտա ձևավորելու գործընթացի խթանումն է, ինչպես նաև զարգացման ազգային հայեցակարգի մշակումը, և ինքն ակտիվորեն ներգրավված է այդ աշխատանքներում։
Մասնագետը խոսել է նաև սպասվելիք արտահերթ ընտրությունների, երկրի կառավարման մոդելի և գործընթացներում հասարակության ներգրավվածության մասին։ Բնականաբար անդրադարձել է նաև արցախյան պատերազմին իր պատճառահետևանքային կապով։
