ԵՐԵՎԱՆ, 30 դեկտեմբերի – Sputnik. Ռուսաստանի Դաշնության անվտանգության դաշնային ծառայության տնօրեն Ալեքսանդր Բորտնիկովի նախաձեռնությամբ դեկտեմբերի 28-ին Մոսկվայում տեղի է ունեցել եռակողմ հանդիպում ՀՀ ազգային անվտանգության ծառայության և Ադրբեջանի անվտանգության պետական ծառայության տնօրենների` Արմեն Աբազյանի և Ալի Նագիևի միջև: Տեղեկությունը հայտնում է ՀՀ ազգային անվտանգության ծառայությունը։
«Հանդիպման ընթացքում քննարկվել են մի շարք անհրաժեշտ հարցեր, այդ թվում՝ նաև գերիների փոխանակման և անհետ կորածների որոնողական աշխատանքներին վերաբերող»,– նշված է հաղորդագրության մեջ:
Ըստ ԱԱԾ–ի` հանդիպման արդյունքում ձեռք են բերվել նաև պայմանավորվածություններ տարբեր ուղղություններով աշխատանքների իրականացման վերաբերյալ:
Հիշեցնենք` երեկ տեղեկացրել էինք, որ ՀՀ ԱԱԾ ղեկավարն ու ԳԾ պետը մեկնել են Մոսկվա։
