ԵՐԵՎԱՆ, 28 դեկտեմբերի - Sputnik. Հայ հեղափոխական դաշնակցությունը հայտարարություն է տարածել, որով կոչ է անում ՀՀ ոստիկանությանը չսատարել հոգեվարքի մեջ գտնվող Հայաստանի դավադիր իշխանություններին և գործել բացառապես ի շահ հայրենիքի և հայ ժողովրդի։
Ներկայացվել է, որ այսօր առավոտյան ՀՅԴ Հայաստանի երիտասարդական միության ընկերները և համակիրները մասնակցել են Ազգային ժողովի մուտքի դիմաց իրականացվող խաղաղ ակցիային, որի ընթացքում քաղաքացիները հավկիթներով դիմավորել են Հայաստանի կործանման դավադիր ծրագրին սատարող «Իմ քայլը» խմբակցության պատգամավորներին։
«Ակցիայի ընթացքում «Իմ քայլը» խմբակցության պատգամավոր Անդրանիկ Քոչարյանը հայհոյել է ցուցարարներին, իսկ նույն խմբակցության պատգամավոր Սիսակ Գաբրիելյանը հարձակվել խաղաղ ակցիա իրականացնողների վրա։
Ոստիկանության կողմից պատգամավորների այս վարքագիծը մնացել է անպատասխան, մինչդեռ խաղաղ ակցիա իրականացնող տասնյակ քաղաքացիներ ապօրինի բերման են ենթարկվել ոստիկանության բաժանմունքներ»,–ասված է հաղորդագրության մեջ։
Ակցիայի մասնակիցներին բերման ենթարկելուց հետո անցել է ավելի քան 3 ժամ, սակայն ոստիկանությունը հրաժարվում է ազատ արձակել վերջիններիս, այդպիսով կոպտորեն ոտնահարելով քաղաքացու իրավունքներն ու ազատությունները։
Մեդիա պաշտպան նախաձեռնությունն էլ հայտնում է, որ ԱԺ դիմաց տեղ ունեցող բողոքի ակցիաների ժամանակ ոստիկանությունը՝ ՊՊԾ գնդի նորանշանակ հրամանատար Սարգիս Հովհաննիսյանի հրահանգով, քաղաքացիներին բերման է ենթարկում։
Բողոքի ակցիա, երթ, լեզվակռիվ. ընդդիմությունը երթով եկավ կառավարության մոտ. տեսանյութ
Ոստիկանական գործողությունների ընթացքում բերման է ենթարկվել PARA TV լրատվական կայքի օպերատոր Վազգեն Համբարձումյանը։ Ոստիկանության նմանօրինակ պահվածքն անընդունելի է։ Վերջին շրջանում ոստիկանները քանիցս անհանդուրժող վերաբերմունք են ցուցաբերում լրատվական ներկայացուցիչների նկատմամբ։
Բողոքի ակցիա իրականացնողներից 8-ը բերման է ենթարկվել. Ոստիկանություն
«Այս դեպքն ուղիղ հարված է խոսքի ազատությանը։ ոստիկանությունն իրավունք չունի խոչընդոտելու օպերատորի և լրատվականի մասնագիտական աշխատանքը։ Նմանատիպ քայլերը պետք է ստանան կոշտ արձագանք»,–ասված է հաղորդագրության մեջ։
«Մեդիա պաշտպան» նախաձեռնությունը դատապարտում է ոստիկանության արարքը, պահանջում վայրկյան առաջ ազատ արձակել իր մասնագիտական պարտականություններն իրականացնող Վազգեն Համբարձումյանին։
