ԵՐԵՎԱՆ, 28 դեկտեմբերի – Sputnik. ԱԺ «Իմ քայլը» խմբակցության պատգամավոր Վաղարշակ Հակոբյանն իր ելույթում ԱԺ-ի մուտքի մոտ տեղի ունեցած իրադարձությունները որակեց որպես խայտառակություն:
«Այն, ինչ այսօր տեղի է ունեցել մեր գործընկերոջ՝ Սիսակ Գաբրիելյանի հետ, սադրանք էր ոչ միայն նրա, այլև պետական ամբողջ ինստիտուտի նկատմամբ: Այն, ինչ տեղի է ունեցել մեր գործընկերոջ հետ, կարող է տեղի ունենալ յուրաքանչյուրի հետ»,- ասաց Հակոբյանը՝ հավելելով, որ տեղի ունեցողը նոյեմբերի 9-10-ի գիշերվա իրադարձությունների շարունակությունն է ու Հայաստանում ձևավորված անպատժելիության մթնոլորտի հետևանքը:
Իշխող խմբակցության անդամ Նիկոլայ Բաղդասարյանն էլ ամբիոնից հարց ուղղեց գործընկերոջը՝ նշելով, որ այն, ինչ տեղի է ունեցել առավոտյան Սիսակ Գաբրիելյանի հետ, ոչ թե սադրանք է, այլ հանցագործություն:
«Ոտնձգողները ոչ մի կապ չունեին քաղաքականության հետ։ Չի կարող քաղաքականությամբ զբաղվող անձը հանցագործության միջոցով հասնել իր նպատակին»,–ասաց նա:
Բաղդասարյանը նշեց, որ ակնկալում է ընդդիմության քննադադատական արձագանքը տեղի ունեցածին ու իրենց թիմակցի պահվածքի վերաբերյալ: Միաժամանակ պատգամավորը նշեց, որ իր տեղեկություններով` միջադեպի առիթով արդեն հարուցվել է քրեական գործ, ու հույս հայտնեց, որ մեղավորները հնարավորինս շուտ կկանգնեն դատարանի առաջ:
Անկախ պատգամավոր Արման Բաբաջանյանը ևս ԱԺ ամբիոնից կոչ ուղղեց քաղաքական ուժերին, բայց ոչ թե վարչապետի հրաժարականը պահանջող ընդդիմությանը, այլ այն ուժերին, որոնք չեն միացել ո՛չ փողոցային պայքարին ու ո՛չ էլ վարչապետին սատարողներին:
«Կարծում եմ՝ իրավիճակը կայունացնելու հիմնական հնարավորությունը հենց այդ ուժերին է վերապահված»,- ասաց նա:
Արման Թաթոյանն արձագանքել է ԱԺ-ի մոտ տեղի ունեցած միջադեպերին
Խոսելով ընդդիմության մասին՝ Բաբաջանյանը նշեց. «Այդ քաղաքական ուժերի պահանջն է, որ այս հեղափոխական խորհրդարանը հակահեղափոխական ռևանշիստին ընտրի որպես երկրի վարչապետ: Դա հղի է նոր քաղաքական պատերազմով և արյունահեղությամբ»:
Բաբաջանյանը շեշտեց, որ ՀՀ քաղաքացին այդ քաղաքական ուժերին իշխանության մանդատով չի օժտել:
ՀՀ վարչապետ Նիկոլ Փաշինյանի առաջարկը՝ 2021թ-ին արտահերթ խորհրդարանական ընտրություններ անցկացնելու մասին, Բաբաջանյանը բնորոշեց որպես հետպատերազմյան շրջանում ճգնաժամի հանգուցալուծմանն ուղղված նվազագույն քայլ:
Արտահերթ ընտրությունները հղի են արյունահեղության վտանգով. ԱԺ-ում կրքերը թեժացել են
