ԵՐԵՎԱՆ, 23 դեկտեմբերի – Sputnik. Մեր թշնամի պետությունը նոր արկածախնդրությունների է պատրաստվում, որոնց դիմակայելու համար Հայաստանին նոր ռազմավարություն է անհրաժեշտ։ Sputnik Արմենիա մուլտիմեդիոն մամուլի ակումբում կայացած ասուլիսի ժամանակ նման տեսակետ հայտնեց «Լուսավոր Հայաստան» կուսակցության առաջնորդ Էդմոն Մարուքյանը։
«Այս պահին ամենաարագ կերպով լուծելու մարտահրավերը Սյունիքի առաջ ծառացած խնդիրն է, քանի որ եռակողմ պայմանագրի համաձայն` Սյունիքի համայնքներն ադրբեջանական տեսադաշտում են հայտնվել։ Եթե նախկինում 150 կմ է եղել հեռավորությունը ադրբեջանական դիրքերից Սյունիքի բնակավայրեր, ապա հիմա 2-3 կիլոմետրի մասին է խոսքը»,–ասաց Մարուքյանը։
Բացի այդ, ըստ նրա, Սյունիքում սահմանազատման հետևանքով բարձրադիր դիրքեր են հայտնվել Ադրբեջանի ձեռքում։ Ինչպես նաև պետք է հաշվի առնել այն հանգամանքը, որ 2021-ի համար Ադրբեջանը նախատեսում է 550 մլն դոլարով ավելացնել ռազմական բյուջեն։ Ուստի ԼՀԿ-ն կարծում է, որ Սյունիքի առջև ծառացած խնդիրը պետք է լուծել Ռուսաստանի հետ նոր համաձայնագիր կնքելու միջոցով։
Ճակատեն գյուղը չի հանձնվում Ադրբեջանին. Սյունիքի մարզպետը հերքել է տեղեկությունը
Մարուքյանը նշեց` բանակցություններ սկսելու համար արդեն քայլեր են արվում։
ԼՀԿ նախագահի խոսքով` Գյումրիում տեղակայված ռուսական ռազմաբազան լավ օրինակ է. այն տասնյակ տարիներ ապահովել է այդ տարածքում ՀՀ–ի անվտանգությունը։
«Արցախում գտնվող ռուս խաղաղապահ ուժերն ավելի հեշտությամբ կարող են սպասարկվել Սյունիքում տեղակայված ռազմաբազայից, քան այլ վայրից։ Ուստի, ՌԴ–ի հետ պետք է բանակցություններ սկսել օր առաջ Սյունիքում ռուսական ռազմաբազա տեղակայելու համար։ Թող այդ ճակատում ՌԴ–ն երկու ռազմաբազա ունենա` Գյումրու և Սյունիքի»,–ասաց Մարուքյանը։
Նրա խոսքով` Հայաստանը միայնակ չի կարող դիմակայել Սյունիքի առջև ի հայտ եկած մարտահրավերին։
Sputnik Արմենիայի հարցին, թե ռուսական կողմի հետ քննարկվե՞լ է ռազմաբազայի ստեղծման առաջարկը, Մարուքյանը պատասխանեց, որ եթե անցումային վարչապետ ընտրվի իրենց թեկնածուն, ՌԴ–ի հետ բանակցություններ կսկսեն։
«Այն հրապարակային առաջարկ է, և եթե անգամ մենք չենք բանակցողը, ապա կողմ ենք, որ ցանկացած մեկը դա անի»,–ասաց նա։
Նշենք, որ դեկտեմբերի 19–ի տեսաուղերձում ՀՀ վարչապետ Նիկոլ Փաշինյանը հայտարարել էր, որ Սյունիքի մարզում սահմանների ճշգրտում է տեղի ունենում, ՀՀ սահմանապահ ուժերը տեղակայվում են ՀՀ միջազգայնորեն ճանաչված սահմաններին։
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը Արցախում ռազմական գործողությունների դադարեցման վերաբերյալ համատեղ հայտարարություն ընդունեցին, որի համաձայն` մի շարք տարածքներ փոխանցվեցին Ադրբեջանին։
Դեկտեմբերի 12-ին ԱԽ նիստում ՀՀ վարչապետ Նիկոլ Փաշինյանը հայտարարեց, որ առաջիկայում պետք է որոշումներ կայացվեն Սյունիքին սահմանամերձ Կուբաթլուի ու Զանգելանի շրջանների հետ կապված։ Նա չբացառեց, որ այդ գործընթացի հետևանքով կարող է որոշակի լարվածություն առաջանալ։
Սահմանը քարտեզը չէ, գրիչի ու ֆլոմաստերի գիծը չէ. Սարհատ Պետրոսյան
