ԵՐԵՎԱՆ, 23 դեկտեմբերի – Sputnik. ՀՀ կառավարությունը հաստատել է Հայաստանի պետական տնտեսագիտական համալսարանի ռեկտորի ընտրության արդյունքները, որոնց համաձայն Դիանա Ռոբերտի Գալոյանն ընտրվել է հիշյալ բուհի ռեկտոր: Համապատասխան որոշումը տեղադրված է կառավարության կայքում։
ՀՊՏՀ ռեկտոր Դիանա Գալոյանի գիտական կոչումը պահպանվեց. նա կշարունակի պաշտոնավարել
«Բարձրագույն և հետբուհական մասնագիտական կրթության մասին» Հայաստանի Հանրապետության օրենքի 15-րդ հոդվածի 4-րդ մասի պահանջին համապատասխան` Հայաստանի Հանրապետության կառավարությունը որոշում է.
1. Հաստատել «Հայաստանի պետական տնտեսագիտական համալսարան» պետական ոչ առևտրային կազմակերպության ռեկտորի պաշտոնում Դիանա Ռոբերտի Գալոյանի ընտրության արդյունքները:
2. Հայաստանի Հանրապետության կրթության, գիտության, մշակույթի և սպորտի նախարարին՝ օրենքով սահմանված կարգով Դիանա Ռոբերտի Գալոյանի հետ կնքել աշխատանքային պայմանագիր` 5 տարի ժամկետով»,–ասված է որոշման մեջ:
Իր` ռեկտորի պաշտոնում ընտրվելու մասին Facebook-ի էջում գրել է նաև Գալոյանը։
«Այսօր, վերջապես, ՀՊՏՀ ռեկտորի «չարչարկված» հարցը ստացավ օրինական լուծում, և ընտրության արդյունքները հաստատվեցին ՀՀ կառավարության կողմից»,–գրել է նա: Գալոյանը նախ շնորհակալություն է հայտնել ընկերներին և ուսանողներին այս ամիսների ընթացքում իր կողքին լինելու և աջակցելու համար: «Չնայած բոլոր դժվարություններին` արդարությունը հաղթեց»,–գրել է նա:
Գալոյանի խոսքով` համավարակն ու պատերազմը առավել վառ ի ցույց դրեցին կրթության ու գիտության զարգացման ու բարեփոխման կարևորությունը մեր երկրում: Նա նշել է, որ պետք է լծվել բուհը լավագույններից մեկը դարձնելու պատասխանատու գործին: «Այսօրվանից սկսած չեմ արձագանքելու ոչ մի գրառման, ոչ մի մեղադրանքի, ոչ մի ստահոդ տեղեկատվական «գրոհի», քանզի իրական կյանքը չի կարող պարտվել վիրտուալին, գործը չի կարող պարտվել պոպուլիզմին, ճշմարտությունը` ստին, սերը` չարությանը, և վերջապես` իրական Հայաստանը չի կարող պարտվել ֆեյսբուքահայաստանին»,–գրել է նա:
Վերջում Գալոյանը հատուկ շնորհակալություն է հայտնել ԿԳՄՍ նախարար Վահրամ Դումանյանին և նախկին փոխնախարար Թամրազյանին սկզբունքայնության և աջակցության համար:
Հիշեցնենք, որ 2018-ից Հայաստանի պետական տնտեսագիտական համալսարանը ղեկավարվում է ռեկտորի պաշտոնակատարների կողմից։ 2020-ի մայիսին ԿԳՄՍ նախարարությունը ՀՊՏՀ-ի ռեկտորի թափուր պաշտոնի մրցույթ հայտարարեց:
Հուլիսի 17-ին կայացած մրցույթում ՀՊՏՀ գիտական խորհրդի անդամների ձայների 2/3-ով ռեկտորի պաշտոնում ընտրվեց Դիանա Գալոյանը: Համաձայն օրենքի` կառավարությունը պետք է հաստատի պետական բուհի ռեկտորի ընտրության արդյունքները, ինչը ընտրությունից ավելի քանի երկու ամիս անց դեռևս չի իրականացվել։
