ԵՐԵՎԱՆ, 22 դեկտեմբերի – Sputnik. ՀՀ գլխավոր դատախազությունը պատրաստ է ձերբակալել վարչապետ Նիկոլ Փաշինյանին՝ հանցանք կատարելու հիմնավոր կասկածների առկայության դեպքում: Այս մասին բողոքի ակցիայի ժամանակ լրագրողների հետ զրույցում հայտնեց «Հայրենիքի փրկության շարժման» իրավական հանձնախմբի նախագահ Արթուր Ղազինյանը, որը մի խումբ փաստաբանների հետ քիչ առաջ դուրս եկավ գլխավոր դատախազ Արթուր Դավթյանի հետ մոտ 40 րոպե տևած հանդիպումից։
«Նրան հայտնեցինք մեր բոլոր մտահոգությունները՝ հարուցված քրեական գործերի շրջանակներում իրականացվող նախաքննության ծավալի համակողմանի, լրիվ և օբյեկտիվ լինելու փաստով։ Հարց հնչեց դատախազին, որ եթե Դուք ունենաք օբյեկտիվ հիմքեր, ունենանք հաստատված մեղք, հիմնավոր կասկած, ապա կձերբակալեք արդյո՞ք վարչապետ Նիկոլ Փաշինյանին։ Պատասխանը դրական էր՝այո»,- ասաց նա։
Արթուր Ղազինյանը նշեց, որ հիմա իրավաբանների, պրոֆեսիոնալ նախկին դատախազների, քննիչների, մասնագետների խնդիրն է գործընթացում հիմնավորել, որ ՀՀ-ում տեղի է ունեցել պատմական մասշտաբի աննախադեպ դավաճանություն։
«Պետական դավաճանության հիմքերը ներկայացված են, դատախազը մեր երաշխավորեց, որ հարուցված բոլոր քրեական գործերով համակողմանի և օբյեկտիվ նախաքննություն է ընթանալու։ Ասվեց, որ կձեռնարկվեն բոլոր միջոցառումները, որևէ հարց անպատասխան չի մնա»,–պատմեց Ղազինյանը։
«Սահմանների հետ կապված կարող է լինել մեկ միջազգային փաստաթուղթ». Նաիրա Զոհրաբյան
Նրա խոսքով` Հայաստանի ներքին և արտաքին անվտանգության օրեցօր խորացող սպառնալիքներն ունենան մեկ լուծում՝ իրավական։ Ընդդիմությունն այս պահին կսպասի դատախազության գործողություններին։
Հիշեցնենք` ՀՀ պաշտպանության նախարարության ռազմական վերահսկողության ծառայության նախկին պետ Մովսես Հակոբյանը նոյեմբերի 18-ին «Հայելի» ակումբում կազմակերպված ասուլիսի ժամանակ մի շարք փաստեր էր ներկայացրել պատերազմի ընթացքի ու հետևանքների մասին։ 2020թ. նոյեմբերի 19-ին ասուլիսի տեսաձայնագրությունը ՀՀ գլխավոր դատախազի կողմից ուղարկվել էր ՀՀ հատուկ քննչական ծառայություն` նյութեր նախապատրաստելու համար:
Այսօր ՀՀ դատախազությունը հայտարարություն տարածեց, որ քննչական գործողությունների արդյունքում ՀՀ ԶՈւ լրահամալրման և զորահամալրման գործընթացը դադարեցնելու վերաբերյալ խորհրդակցության, դրա ընթացքում ՀՀ վարչապետի կողմից հրահանգներ տալու մասին վկայող ձայնագրություններ չեն հայտնաբերվել:
Նշենք, որ դատախազությունում պատերազմին վերաբերող նյութերով 882 քրեական գործ է հարուցվել։ Դրանցում ներգրավվել են բարձրաստիճան պաշտոնյաներ ու զինվորականներ։
Հիշեցնենք, որ «Հայրենիքի փրկության շարժման» դեկտեմբերի 16–ի բողոքի ակցիայի ժամանակ հայտարարվեց, որ դեկտեմբերի 22-ը համահայաստանյան գործադուլի և դասադուլի օր կլինի։ Դասադուլին միացել են ԵՊՀ և ԵՊԲՀ–ի որոշ ֆակուլտետներ, իսկ գործադուլին մասնակցելու մասին արդեն հայտարարել է Մոր և մանկան առողջության պահպանման գիտահետազոտական կենտրոնը։
