Բողոքի ակցիայի մասնակիցները վանկարկում են «Հայաստանն առանց Նիկոլ»։ «Բարգավաճ Հայաստան» կուսակցության անդամ, պատգամավոր Նաիրա Զոհրաբյանն իր ելույթի ընթացքում անդրադարձավ Նիկոլ Փաշինյանի` սահմանների մասին այսօրվա գրառմանը` նշելով, որ Հայաստանի և ցանկացած պետության սահման որոշվում է պետական սահմանի մասին օրենքով։
«Սահմանների հետ կապված կարող է լինել մեկ միջազգային փաստաթուղթ, դա Հայաստանի և Ադրբեջանի միջև հնարավոր միջազգային պայմանագիրն է, որը չկա»,–ասաց Զոհրաբյանը։
Նշենք, որ այսօր ՀՀ վարչապետ Նիկոլ Փաշինյանը Facebook–ի իր էջում հրապարակել է 2010 թվականին ընդունված այն օրենքը, որում ներկայացված է Գեղարքունիքի մարզի Սոթք գյուղի սահմանագծերի նկարագրությունը։
«Սա էլ Գեղարքունիքի մարզի Սոթք գյուղի սահմանագծերի նկարագրությունը՝ 2010 թվականին ընդունված ՀՀ վարչատարածքային բաժանման մասին օրենքով։ Այսօր մեր զինված ուժերը տեղակայված են այս նկարագրությամբ։ Հիշեցնեմ՝ 2010 թվականին օրենքին կողմ են քվեարկել ՀՀԿ, ԲՀԿ, ՀՅԴ խմբակցությունները։ Օրենքի նախագիծը ներկայացրել է կառավարությունը»,–գրել է Փաշինյանը։
Հիշեցնենք, որ «Հայրենիքի փրկության շարժման» դեկտեմբերի 16–ի բողոքի ակցիայի ժամանակ հայտարարվեց, որ դեկտեմբերի 22-ը համահայաստանյան գործադուլի և դասադուլի օր կլինի։ Դասադուլին միացել են ԵՊՀ և ԵՊԲՀ–ի որոշ ֆակուլտետներ, իսկ գործադուլին մասնակցելու մասին արդեն հայտարարել է Մոր և մանկան առողջության պահպանման գիտահետազոտական կենտրոնը։
Դեկտեմբերի 12-ին բժշկական համալսարանի մի շարք աշխատակիցներ միացել էին ՀՀ-ի և սփյուռքի ավելի քան 300 բուժաշխատողների պահանջին` ստեղծված վիճակի համար պատասխանատու անձանց հրաժարականների ու կառավարության ինքնակամ և անցնցում հեռացման մասին:
