Մեր երկիրը ո՛չ հումքային ու մասնագիտական բազայով, ո՛չ էլ աշխատուժով մրցունակ չի կարող լինել Չինաստանի կամ Թուրքիայի հետ, հետևաբար տեղական արտադրողի համար, օրինակ, հարկային դաշտում, կամ մեկ այլ ոլորտում, համապատասխան պայմաններ պետք է ստեղծել, որ մեկը մյուսին փոխլրացնի։ Sputnik Արմենիայի հետ զրույցում նման կարծիք հայտնեց մարկետոլոգ Վահրամ Միրաքյանը։
Նրա խոսքով` տեղական արտադրողներն էլ պետք է ձգտեն տեղական շուկայում մասնագիտանալ, որ հետագայում արտահանման հետ կապված խնդիրներ չծագեն։ իսկ տեղական շուկայում արտադրողները ձախողում են հիմնականում մի քանի պատճառով։
«Օրինակ` բրենդինգին նորմալ չեն վերաբերվում, մարքեթինգին նորմալ չեն վերաբերվում, վաճառքին նորմալ չեն վերաբերվում, կենտրոնանում են մենակ արտադրություն ունենալու վրա, դրա պատճառով, եթե նրանց հաջողվում է տեղական շուկայում առաջ գնալ, ապա նույնը չես կարող ասել արտահանման դեպքում. չեն կարողանում արտաքին շուկա դուրս գալ»,- ասաց նա։
Միրաքյանի կարծիքով` եթե առաջին դեպքում մեղքը պետությանն է, երկրորդ դեպքում հիմնական խնդիրը բիզնեսինն է. բիզնեսը պետք է պրոֆեսիոնալ մոտենա ամեն ինչին, չնայած այստեղ էլ պետությունն անելիք ունի։
«Երկրներ կան, որ արտադրողները մինչև որոշակի կուրսեր չանցնեն, չեն կարող արտադրություն հիմնել։ Բիզնես սկսելու համար նախ պետք է կուրսեր անցնել, կուրսերն էլ հենց այնպես չէ, պետությունն է լիցենզավորում»,- նշեց մարկետոլոգը։
Մասնագետը համոզված է` թուրքական ապրանքների ներկրման արգելքը ծանր դրության մեջ կդնի այն մարդկանց, որոնք զբաղվում են թուրքական ապրանքների ներկրմամբ, նրանք կամ ստիպված կլինեն այլընտրանք գտնել, կամ ինքնարժեք բարձրացնել, մինչդեռ տեղական արտադրողներն ավելի շահեկան դիրքում կհայտնվեն։
Ինչպե՞ս Հայաստանը պետք է բոյկոտի թուրքական ապրանքը․ բիզնեսմենները տարբերակ են գտել
«Տեղական արտադրողի համար շուկա կազատվի, օրինակ, թղթյա պարագաների դեպքում ծանոթներ ունեմ, որոնք իրենց շուկան մեծացրել են, քանի որ ունեին որակյալ արտադրություն, որը եկավ փոխարինելու թուրքականին, բայց ոլորտներ կան, որոնք չունեն համապատասխան որակի ապրանք, այդպիսիք չեն կարող գրավել թուրքականի տեղը, կամ դանդաղ կգրավեն»,- ընդգծեց նա։
Նշենք, որ ՀՀ կառավարության որոշմամբ 2020 թվականի դեկտեմբերի 31-ից Հայաստանում 6 ամսով կարգելվի թուրքական ապրանքների ներկրումը։
