ԵՐԵՎԱՆ, 21 դեկտեմբերի Sputnik. Մոր և մանկան առողջության պահպանման գիտահետազոտական կենտրոնը կմիանա դեկտեմբերի 22-ին կայանալիք համահայաստանյան գործադուլին: Տեղեկությունը հայտնում է բուժկենտրոնի պաշտոնական կայքը։
Նշվում է, որ որոշման պատճառը Հայաստանի Հանրապետությունում ստեղծված ներքաղաքական իրավիճակն է։
«Դեկտեմբերի 22-ին կենտրոնը սպասարկելու է միայն անհետաձգելի բժշկական օգնության կարիք ունեցող հիվանդներին»,– նշված է հայտարարության մեջ:
Հավելենք` այսօր ԵՊՀ մի շարք ֆակուլտետներ միացել են ՀՀ վարչապետ Նիկոլ Փաշինյանի հրաժարականի պահանջին ու նշել, որ կմասնակցեն 2020 թ. դեկտեմբերի 22-ի համազգային անհնազանդության միջոցառումներին: Ավելի վաղ հրաժարականի պահանջով հայտարարություններ էին տարածել Գիտությունների ազգային ակադեմիան, Երևանի պետական համալսարանի գիտական խորհուրդը, Հայաստանի ու Արցախի զինված ուժերի պահեստազորի և պաշտոնաթող գեներալներ, ԱԱԾ նախկին 13 աշխատակիցներ և այլն։
Հիշեցնենք, որ Հայաստանում բողոքի ակցիաները՝ վարչապետի հրաժարականի պահանջով, սկսվել են նոյեմբերի 9-ին Արցախում հրադադար հաստատելու վերաբերյալ եռակողմ հայտարարության ստորագրումից հետո։
Ընդդիմադիր կուսակցությունների նախաձեռնությամբ ստեղծվել է Հայրենիքի փրկության շարժում, որը վարչապետի միասնական թեկնածու ունի` Հանրային խորհրդի նախկին նախագահ Վազգեն Մանուկյանը։
Դեկտեմբերի 16-ին Հայրենիքի փրկության շարժման բողոքի ակցիայի ժամանակ հայտարարվեց, որ դեկտեմբերի 22-ը համահայաստանյան գործադուլի և դասադուլի օր կլինի։
