Հակածխախոտային միջոցառումների արդյունքում, ըստ Վահագն Խաչատրյանի, Հայաստանում կկրճատվեն ակցիզային հարկի մուտքերը, և կլինի հարկահավաքման էական նվազում։ Տնտեսագետն ընդգծում է, որ հիմա արդեն խնդիրը կարող է զգալի լինել։ Նրա խոսքով` ԵԱՏՄ շրջանակներում մենք օգտագործում էինք ամենացածր ակցիզային հարկը, դրված էր համահավասարեցման հարց, ուստի մեր տնտեսության վրա էական ազդեցություն ունի նաև ծխախոտի արտադրությունը, որը նաև արտահանման մեջ, հարկային մուտքերով հանդերձ, ունի էական դեր։
«Հասկանալի է, որ գտնվում ենք նույն միության մեջ և չնայած այն հանգամանքին, որ կա տարբեր հարկադրույքաչափերի խնդիր,այդուհանդերձ միշտ ցածր ակցիզի պարագայում արտադրողներն ունենում են արտահանման ու սպառման ավելի լավ հնարավորություններ»,– նշեց տնտեսագետը։
Խաչատրյանի գնահատմամբ` մեր երկրի տնտեսական քաղաքականությունն այնպիսին էր, որ նման ակցիզային դրույքաչափերի դեպքում կարողանում էինք որոշակի առավելություն ստանալ` նպաստելով արտահանողների գործունեությանը։ Նրա խոսքով` պետք չէ մոռանալ նաև աշխատատեղերի և այն հանգամանքի մասին, որ այդտեղ բացի հարկերից կան նաև սոցիալական բնույթի հարցեր։
«Ծխախոտի արտադրությունն ամբողջությամբ Հայաստանի տնտեսության համար բազմակողմանի ազդեցություն ունի հարկային մուտքերի, տնտեսական աճի, սոցիալական հարցերի լուծման և այլ առումներով, ուստի այս հանգամանքի հաշվառումն ավելի կարևոր է, քան որոշ առաջադեմ երկրներին բնորոշ նորմերով ապրելակերպի սահմանումը։ Այդ նորմերով ապրելու համար անհրաժեշտ է ունենալ նաև համապատասխան քաղաքացի` համարժեք եկամտով, որպեսզի հնարավոր լինի բավարարել այդ քաղաքացու մյուս պահանջները»,– նշեց տնտեսագետը։
Պատգամավորները դեմ էին, բայց կողմ քվեարկեցին. արգելված վայրերում ծխողները կտուգանվեն
Նրա կարծիքով` եթե ցանկանում ենք ապրել այն չափանիշներով, այդ թվում և հակածխախոտային, որոնք կան զարգացած երկրներում, ապա դրանք թանկ հաճույք են, որի համար պետք է վճարել։ Ըստ նրա` մենք լուծում ենք ծխախոտի հարցը` ելնելով առողջապահական հիմքերից, սակայն դրա փոխարեն ծխողներին այլընտրանք չենք առաջարկում։
