ԵՐԵՎԱՆ, 20 դեկտեմբերի - Sputnik. Գորիսի քաղաքապետ Առուշան Առուշանյանը Facebook-ի իր էջում գրառում է արել, որով համաքաղաքացիներին կոչ է անում առավոտյան միանալ իրենց խմբին և արգելել ՀՀ վարչապետ Նիկոլ Փաշինյանի մուտքը Սյունիք։
Հիշեցնենք, որ Նիկոլ Փաշինյանը Facebook-ի իր էջի միջոցով տեղեկացրել էր, որ երկուշաբթի` դեկտեմբրի 21–ին կայցելի Սյունիքի մարզ։«Կայցելեմ Մեղրի, Կապան, Գորիս, Սիսիան՝ հանդիպելու քաղաքացիների, ՏԻՄ եւ մարզային կառույցների ներկայացուցիչների հետ»,–գրել էր նա։
«Գորիս համայնքի հարգելի բնակիչներ, առավոտյան ժամը 06։00-ին Գ․ Տաթևացու անվան հրապարակից ավտոմեքենաների շարասյունը կմեկնի Սյունիքի դարպասներ՝ արգելելու հայոց հողը օտարող, Սյունիքի երբեմնի անառիկությունը խաթարող «վարչապետի» մուտքը Սյունիքի մարզ։ Բոլոր արժանապատիվ գորիսեցիներին կոչ ենք անում միանալ կամավոր շարժերթին»,–գրել է նա` իր գրառումը «Սյունյաց հողը անարատ է, չարի սերմը բուն չի դնի, անարմատ է» վերնագրելով։
Առուշանյանն ընդգծել է, որ սա քաղաքական կողմնորոշում չէ և ոչ էլ որևէ կուսակցության նախաձեռնություն, սա սյունեցիների արժանապատվության, անվտանգության և ֆիզիկական գոյության պայքարն է, համահայկական ընդվզման արտահայտումը։
«Մենք մեր սերունդներին ավանդ պետք է թողնենք՝ անարատ հողը նախնյաց...»,–գրել է Գորիսի քաղաքապետը։
Այսօր ավելի վաղ, երբ Գորիս–Կապան ճանապարհի Որոտանի հատվածում ադրբեջանական դրոշով ադրբեջանցի զինծառայողներ էին հայտնվել, Առուշանյանն իր մտահոգությունն էր հայտնել` Փաշինյանին հարց ուղղելով, թե ինչ երեսով է վաղը Սյունիք գալու։
