ԵՐԵՎԱՆ, 19 դեկտեմբերի - Sputnik. Արցախյան պատերազմում զոհված ազատամարտիկների մայրերը փակել են Եռաբլուր զինվորական պանթեոնի մուտքը։ Նրանք նստել են Եռաբլուր տանող աստիճաններին` թույլ չտալու համար, որպեսզի ՀՀ վարչապետ Նիկոլ Փաշինյանն ու նրա ուղեկից սգո երթի մասնակիցները մտնեն պանթեոնի տարածք (ՏԵՍԱՆՅՈւԹԸ` ՔԻՉ ԱՆՑ):
Նրանց հետ ճանապարհը փակել են նաև արցախյան ազատամարտի մասնակիցներ, հասարակական–քաղաքական գործիչներ, քաղաքացիներ։
Եռաբլուրում իրավիճակը լարված է։ Քիչ առաջ ընդհարում տեղի ունեցավ հավաքվածներից երկու տղամարդկանց միջև։ Նրանցից մեկը հայտարարեց, որ չի կարելի ազգը բաժանել երկու բևեռի։
«Բոլորս հայ ենք»,– ասաց նա։
Մյուս տղամարդը հայտարարեց, որ դավաճաններն իրենց կողքին անելիք չունեն։ Վիճաբանությունը դադարեցվեց տեղում ծառայություն իրականացնող ոստիկանների միջամտությամբ։
Նշենք` Հանրապետության հրապարակից ՀՀ վարչապետի գլխավորությամբ մեկնարկած սգո երթի մասնակցիներն այս պահին «Հաղթանակ» կամրջի հատվածում են։
Ընդդիմության ներկայացուցիչներն ու նրանց կողմնակիցները երթի մասնակիցներին սպասում են Եռաբլուրի մուտքի մոտ` հայտարարելով, որ Փաշինյանին թույլ չեն տալու մտնել Եռաբլուր։
«Իսկ ի՞նչ ենք անելու հաջորդիվ, ինչպե՞ս ենք ապրելու սրանից հետո». Փաշինյանն ուղերձ է հղել
