ԵՐԵՎԱՆ, 18 դեկտեմբերի - Sputnik. Շիրակի մարզի 72 հոգանոց կամավորականների խումբն Արցախից ճանապարհվել է դեպի տուն։ Տեղեկությունը Facebook-ի իր էջում հայտնում է ՀՀ ԱԺ «Իմ քայլը» խմբակցության պատգամավոր Սոֆյա Հովսեփյանը։ Նրա խոսքով՝ ինքն ու «Իմ քայլի» մեկ այլ պատգամավոր Նազելի Բաղդասարյանը նոր են վերադարձել Շուշիի շրջանի Մեծ Շեն և Հին Շեն գյուղերից։ Իրենց աչքերով տեսել են, որ այնտեղ ամեն ինչ նորմալ է, ճանապարհները բաց են, խաղաղապահներն էլ` իրենց տեղում։
«Ամեն ինչ կարգին է, և հերթափոխն էլ հավուր պատշաճի կազմակերպված էր։ Բոլորին տեսել ենք, բոլորն էլ լավ էին և ժամերի ընթացքում կլինեն մարզում»,- գրել է Հովսեփյանը։
Նա հորդորել է զգույշ և ուշադիր լինել տեղեկատվության տարածման հարցում:
Նշենք, որ խոսքը վերաբերում է Շիրակի մարզի 58 կամավորականներին ու ՄՈԲ֊ի 12 տղաներին, որոնք հայտնվել էին շրջափակման մեջ։ Նրանք անվտանգ դուրս են եկել շրջափակումից, իջել դիրքերից ու արդեն վերադառնում են տուն։ Նրանց հետ կապը որոշ ժամանակով ընդհատվել էր. այդ էր պատճառը, որ դեկտեմբերի 16-ին տեղեկություն տարածվեց, թե ադրբեջանական զինուժի կողմից մոտ 150 շիրակցի է գերեվարվել։
«Կամավորների մեջ էին 2 խոշորացված համայնքների ղեկավարներ, համայնքի ղեկավարի տեղակալներ, վարչական ղեկավարներ, որոնք ամուր պահել են իրենց վստահված դիրքերը և զիջել դրանք միայն իրենց հերթափոխի հասած մեր եղբայրներին, իսկ կեսգիշերն անց մեր կամավորներին կդիմավորենք արդեն Շիրակի մարզում»,- Facebook -ի իր էջում հավելել է «Իմ քայլի» պատգամավոր Կարեն Սարուխանյանը։
Հիշեցնենք՝ ավելի վաղ Արցախի Հանրապետության տարածքային կառավարման և զարգացման նախկին նախարար Ժիրայր Միրզոյանը Sputnik Արմենիայի թղթակցի հետ զրույցում նշել էր, որ ադրբեջանցիները դեկտեմբերի 13-ից կանգնել են Մեծ Շենից Հին Շեն գյուղ տանող միակ ճանապարհին՝ հայտարարելով, որ այդտեղ կանգնելու հրաման ունեն։ Երկու գյուղերն էլ գտնվում են Արցախի հսկողության տակ։ Այդ ընթացքում Արցախի զինված ուժերը տեղում լրացուցիչ ուժեր են կուտակել` իրավիճակը վերահսկողության տակ պահելու համար։
Արտակ Բեգլարյանը այցելել է Մեծ Շեն ու Հին Շեն գյուղեր` ծանոթացել իրավիճակին
Ավելի ուշ հայտնի դարձավ, որ հաջողվել է ճանապարհից հեռացնել ադրբեջանական հենակետը և ապաշրջափակել Հին Շենը։
Հիշեցնենք նաև, որ դեկտեմբերի 16-ին Արցախի Հանրապետության պաշտպանության բանակի մամուլի ծառայությունը հայտնեց, որ դեռևս անհայտ պայմաններում կորել է կապը Հադրութի Հին Թաղեր և Խծաբերդ գյուղերի ուղղությամբ տեղակայված մի քանի մարտական դիրքերի անձնակազմի հետ։ Այնուհետև լուրեր տարածվեցին, որ նրանք գերի են ընկել։ Ավելի ուշ Արցախի ՄԻՊ Արտակ Բեգլարյանը հաստատեց, որ ըստ նախնական տվյալների՝ Հադրութի շրջանի Խծաբերդ գյուղի ուղղությամբ այս օրերին անհետ կորել է շուրջ 60 զինծառայողից բաղկացած մի ստորաբաժանում։ Հետո հայտնի դարձավ, որ ավելի քան 30 հայ կամավորներ կարողացել են դուրս գալ ադրբեջանցիների շրջափակումից։
