ԵՐԵՎԱՆ, 18 դեկտեմբերի - Sputnik. Հայաստանի և Ադրբեջանի միջև սահմանազատման աշխատանքների արդյունքում, հնարավոր է, Շուռնուխ գյուղի 12 տուն ադրբեջանական տարածքում հայտնվի։ Տեղեկությունը Sputnik Արմենիայի հետ զրույցում հայտնում է Սյունիքի մարզի Շուռնուխի գյուղապետ Հակոբ Արշակյանը։ Նրա խոսքով՝ կադաստրային քարտեզով տները գյուղի տարածքում են, սակայն ադրբեջանական GPS-ը ցույց է տալիս, որ ճանապարհից ներքև ընկած հատվածն ադրբեջանական ԽՍՀ տարածքում է։
«Երեկ պաշտպանության նախարարն ասաց, որ գյուղի հարցը քննարկվում է, դեռ անորոշ է։ Երկու ժամ առաջ նախարարության ներկայացուցիչն ասաց, որ գյուղը մնալու է հայկական վերահսկողության տակ»,- նշում է գյուղապետը։
Ըստ ադրբեջանցիների՝ Գորիսից դեպի Շուռնուխ և Շուռնուխից դեպի Կապան գնացող ճանապարհներն էլ են հատում սահմանը։ Գյուղապետի տեղեկություններով՝ այդտեղ կանգնելու են հայ և ադրբեջանցի սահմանապահները, բայց թե քանի մետր հեռավորություն է նրանց միջև լինելու, դեռ հայտնի չէ։
«Այսօր ես արդեն ստիպված ժողովրդին ասել եմ՝ ձեր ցանկությամբ, ինչպես ուզում եք»,- ասում է գյուղապետը՝ պատասխանելով այն հարցին, թե արդյոք բնակիչները սկսել են լքել գյուղը։ Շեշտում է՝ մինչև երեկ առավոտյան ասում էր, որ լավ է լինելու, իսկ երբ երեկ հայկական զորքը հանվեց, նախարարի հետ խոսելուց հետո էլ հասկացավ՝ ամեն ինչ անորոշ է, ստիպված էր այդ մասին ասել ժողովրդին։ Ապահովության համար կանանց և երեխաներին գյուղից արդեն հանել են։
Ասում է, որ գյուղի վերջին տներից մեկն իրենն է. գյուղի վարչական տարածքը վերջանում է տնամերձ հողամասի սահմանին։
«Վաղը պարզ կլինի՝ հայ սահմանապահն իմ բոստանում է կանգնելու, բոստանից դուրս, թե հիսուն մետր հեռու։ Միգուցե, ասում են, մայրուղում է կանգնելու։ Այդպես տները պաշտպանված չեն լինի։ Աբսուրդ է»,- ավելացնում է գյուղապետը։
Հիշեցնենք, որ կամավորներից մեկի փոխանցմամբ՝ Շուռնուխից մինչև ադրբեջանցիների մոտակա դիրքն ուղիղ գծով մոտավորապես 1 կիլոմետր է։
Հավելենք, որ հայկական զինուժն ու կամավորները հեռանում են Սյունիքում զբաղեցրած դիրքերից դելիմիտացիայի ու Ադրբեջանի հետ սահմանների դեմարկացիայի շրջանակներում։ Դա բողոքի ակցիաների պատճառ է դարձել սահմանամերձ համայնքներում։
