Կապիտուլիացիոն փաստաթղթի ստորագրում, խայտառակ ձախողում, տարածքային կորուստներ, հազարավոր զոհեր և վիրավորներ, գերեվարված քաղաքացիական անձինք և զինվորականներ. Թերևս սա է պատճառը, որ ԱՀ նախագահ Արայիկ Հարությունյանը որոշել է բարձրաձայնել այն մասին, որ պատերազմական գործողությունների ողջ ընթացքում ՊԲ-ն ղեկավարվել է ոչ թե ԱՀ իշխանությունների, այլ պաշտոնական Երևանի կողմից:
Sputnik Արմենիայի հետ զրույցում նման կարծիք հայտնեց քաղաքագետ Ալեն Ղևոնդյանը՝ մեկնաբանելով ԱՀ նախագահի ուղերձում հնչեցրած այն հայտարարությունը, որում Հարությունյանը խոսում էր ՊԲ-ի կառավարման և այդ գործընթացում իր ընդգրկվածության մասին:
«Պատասխանատվության սլաքների ուղղումը մի կետից մյուս կետ կյանքի իրավունք ունի անկասկած, բայց պետք է նաև հստակ նշել, որ ռազմական գործողությունների կառավարումը ոչ միայն Հայաստանի ՊՆ շրջանակներում է ապահովվել, այլ նաև Արցախում գործող ռազմական պլանավորման խորհրդի ձևաչափով է իրողություն դարձել»,- ասաց նա:
Ղևոնդյանը հիշեցնում է հայտնի ռազմական աքսիոման՝ հաղթանակն ունի բազում տերեր, պարտությունն անտեր է և ընդգծում՝ նմանօրինակ հայտարարությունների կոնտեքստում առերեսվում ենք պատասխանատվությունից խուսափելու, խնդիրները մի օղակից մյուսի վրա գցելու իրողությունների հետ:
Ստեփանակերտում ադրբեջանցիներ չեն բնակեցվի. Արցախի նախագահի խոսնակը հերքում է
Քաղաքագետի կարծիքով՝ նախագահ ընտրվելու առաջին իսկ օրից Հարությունյանի համար գաղտնիք չի եղել, որ պետք է պաշտոնական Երևանի հետ կոորդինացված քաղաքականություն իրականացնի, մինչդեռ երեկվա ուղերձում Հարությունյանը հասկացրեց, որ պատերազմի ժամանակ չի ունեցել բավարար լծակներ Արցախի տարածքային ամբողջականությունն ապահովելու համար:
«Հարությունյանը որոշակի անձնական կապեր ունի ՌԴ-ում, որոնք նա փորձել է օգտագործել այս քաղաքական կամ տնտեսական, կամ ներդրումային ինչ-որ իրողությունների համատեքստում: Հավանաբար, ինքնուրույնություն ասելով ի նկատի ունի այն հնարավորությունները, որոնք ինքն ունեցել է, բայց որոնց կիրառման մասով վետո է դրվել, և ինքը չի կարողացել այդ հնարավորւթյուններից օգտվել»,- նշեց նա:
Քաղաքագետի դիտարկմամբ՝ ստեղծված իրավիճակում պատասխանատուներից յուրաքանչյուրն ամեն գնով փորձելու է իր անվտանգության խնդիրը լուծել: Ղևոնդյանը չի բացառում, որ առաջիկայում նոր սենսացիոն ձայնագրություններ և տեսանյութեր կներկայացվեն հանրությանը:
Հիշեցնենք՝ երեկ ժողովրդին դիմած տեսաուղերձում ԱՀ նախագահ Արայիկ Հարությունյանը՝ խոսելով պատերազմում արձանագրված ձախողումների մասին, նշել էր. «Եթե Սահմանադրությամբ Հանրապետության նախագահը Արցախի ինքնիշխանության, անկախության, տարածքային ամբողջականության ու անվտանգության երաշխավորն է, արդյո՞ք ունեցել եմ ներքին ու արտաքին բավարար հնարավորություններ ու լծակներ այս լայնածավալ պատերազմում լիովին երաշխավորել նշված չորս արժեքները: Կամ եթե Սահմանադրությամբ Հանրապետության նախագահը զինված ուժերի գերագույն գլխավոր հրամանատարն է, ապա ու՞մ համար է գաղտնիք, թե իրականում Պաշտպանության բանակն ինչպես ու որտեղից է կառավարվում եւ թե որքանով է ԱՀ նախագահն ընդգրկված այդ գործընթացներում»:
Հարությունյանի ուղերձին հաջորդեց Նիկոլ Փաշինյանի՝ «Ազատություն» ռադիոկայանին տված հարցազրույցը, որտեղ ՀՀ վարչապետը նշեց, որ պատերազմի ձախողված ելքի թիվ մեկ պատասխանատուն ինքն է, բայց ոչ թիվ մեկ մեղավորը:
