Կապանի քաղաքապետ Գևորգ Փարսյանը Sputnik Արմենիայի հետ զրույցում, գնահատելով կապանցիների բողոքի ակցիան ընդդեմ Սյունիքի նոր սահմանազատման, ասաց. «Ճիշտ է անում ժողովուրդը»։
Նրա դիտարկմամբ` վիճակը հասել է նրան, որ քաղաքացիներն ու կամավորները ստիպված են ճանապարհներ փակել` հանուն անվտանգության երաշխիքների։
«Դա այն հարցն է, որի մասին ես արդեն մեկ ամսից ավել խոսում եմ»,– ասաց Փարսյանը։
Նա նաև հաստատեց տեղեկություններն այն մասին, որ Սյունիքի սահմաններն ու դեռևս հայկական կողմի վերահսկողության տակ մնացած դիրքերը հսկող կամավորներին ՀՀ ՊՆ–ից հրահանգվել է հետ քաշվել մինչև նախկին խորհրդային սահմանի տարածքը։
«Մենք դիրքեր էինք զբաղեցրել էինք թե՛ քաղաքի, թե՛ գյուղերի անվտանգությունն ապահովելու համար, հիմա այդ անվտանգության գոտին այլևս չի լինելու։ Մեր բնակելի հատվածից թշնամին լինելու է 1 կմ, օդանավակայանից` 200-300 մ հեռավորության վրա։ Մեր գյուղերը երկու կողմից բլոկադայի մեջ են հայտնվում։ Խայտառակ վիճակի մեջ ենք ընկնում»,– ասաց Փարսյանը։
Կապանում դեռ սպասում են ՊՆ–ի ու ռուս խաղաղապահների պարզաբանումներին։ Բողոքի ակցիան շարունակվում է։ Ակցիայի մասնակիցներին է այցելել նաև մարզպետ Մելիքսեթ Պողոսյանը։
ՀՀ պաշտպանության նախարարությունն էլ հայտնում է, որ Սյունիքի մարզ կատարած այցի շրջանակում ՀՀ պաշտպանության նախարար Վաղարշակ Հարությունյանն աշխատանքային խորհրդակցություն է անցկացրել զորամիավորման հրամանատարի, Սյունիքի մարզպետի և ԱԱԾ սահմանապահ զորքերի տարածքային ստորաբաժանման հրամանատարի մասնակցությամբ:
Քննարկվել են Հայաստանի և Ադրբեջանի սահմանազատման, նոր ձևավորվող բնագծերում զինված ուժերի ստորաբաժանումների և սահմանապահ զորքերի տեղակայման հետ կապված հարցեր:
