ԵՐԵՎԱՆ, 17 դեկտեմբերի - Sputnik. Ս.թ դեկտեմբերի 16-ին Արցախի Հանրապետությունում տեղակայված ռուսական խաղաղապահ զորախմբի կողմից ԱՀ ՊԲ-ին է փոխանցվել, նախնական տեղեկություններով, Հին Թաղեր-Խծաբերդ ուղղությամբ տեղակայված հայկական մարտական դիրքերի մերձակա տարածքում հայտնաբերված 9 հայ զինծառայողի մարմին, որոնց զոհվելու հանգամանքները դեռևս անհայտ են։ Հայտնում են ԱՀ ՊԲ լրատվական ծառայությունից։
Ներկա պահին իրականացվում են անհրաժեշտ գործողություններ՝ զինծառայողների զոհվելու հանգամանքներն ու նրանց ինքնությունը պարզելու ուղղությամբ։
Արցախի Հանրապետության պաշտպանության բանակի մամուլի ծառայությունն ավելի վաղ հայտնել էր, որ դեկտեմբերի 15-ի երեկոյան դեռևս անհայտ պայմաններում կորել է կապը Հադրութի Հին Թաղեր և Խծաբերդ գյուղերի ուղղությամբ տեղակայված ԱՀ ՊԲ մի քանի մարտական դիրքերի անձնակազմի հետ։ Ռուսական խաղաղապահ զորախմբի միջնորդությամբ գործուն քայլեր են իրականացվում` հայ զինվորականների գերեվարման հավանականությունը պարզելու, դրա հաստատվելու դեպքում անհրաժեշտ գործողություններ ձեռնարկելու համար։
Դեկտեմբերի 16-ին էլ ՊԲ-ն հաղորդագրություն էր տարածել՝ նշելով, որ Հադրութի շրջանի Խծաբերդ-Հին Թաղեր հատվածում ուղղությունում անհետ կորած 73 զինծառայողի ճակատագիրը դեռ շարունակում է անհայտ մնալ։
Խծաբերդի մոտ կամավորականների 150 հոգանոց խումբ գերի է ընկել. մեծ մասը Շիրակի մարզից են
Հավելենք, որ Արցախյան պատերազմում հայկական կողմի զոհերի, վիրավորների, անհետ կորածների ու գերիների թվի վերաբերյալ պաշտոնական տվյալներ չկան։
