ԵՐԵՎԱՆ, 16 դեկտեմբերի - Sputnik. Մարտակերտ քաղաքի առավել կարիքավոր ընտանիքները ռուսական խաղաղապահ զորախմբից ստացել են մարդասիրական օգնության 200 փաթեթ։ Տեղեկությունը հայտնում է ՌԻԱ Նովոստին:
Հումանիտար փաթեթներում, որոնք ստացել են շուրջ 200 ընտանիք, ընդգրկված են սննդամթերք, կենցաղային մաքրող միջոցներ, մանկական սնունդ և անձնական հիգիենայի պարագաներ:
Հակամարտող կողմերի հաշտեցման կենտրոնի ղեկավար, գնդապետ Իգոր Սիվակովի խոսքով՝ ընդհանուր առմամբ խաղաղապահների կողմից այստեղ առաքվել է 12 տոննա մարդասիրական բեռ:
«Լեռնային Ղարաբաղի առավել կարիքավոր ընտանիքներին հումանիտար օգնություն է տրամադրվում ՌԴ նախագահի և կառավարության հանձնարարականներին համապատասխան», - հայտնել է նա։
Մարտակերտի շրջանի վարչակազմի ղեկավարի տեղակալ Նելսոն Աթայանը հիշեցրել է, որ Մարտակերտը վերջին շրջանում տեղի ունեցած բախումների հետևանքով առավել տուժած քաղաքներից մեկն է եղել:
Ամեն թփի տակ խաղաղապահ չկա. որքանո՞վ էր լուրջ դեկտեմբերյան սրացումն Արցախում
«Մեր քաղաքին հատկապես խոշոր վնաս է հասցվել։ Դրան նպաստել են և՛ հրետակոծությունները, և՛ օդից ռմբակոծությունները, և՛ անօդաչու թռչող սարքերի հարձակումները։ Այժմ շրջանը և քաղաքը վերականգնվում են, մենք փորձում ենք վերքերը բուժել պատերազմից հետո», - ասել Է Աթայանը։
Նրա խոսքով՝ առաջին հերթին օգնության կարիք ունեն այն քաղաքացիները, որոնք մարտական գործողությունների ընթացքում զրկվել են օթևանից:
«Առաջին հերթին վերականգնում ենք հիվանդանոցները, դպրոցները։ Շատ են նրանք, ովքեր կորցրել են իրենց տները։ Բայց եթե խոսենք ընդհանուր իրավիճակից, ապա խաղաղ կյանքը վերադառնում է», - նշել է պաշտոնյան։
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվել է Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորախումբը տեղակայմանը զուգահեռ դուրս են բերվում հայկական զինված ուժերը։ Ռուսաստանի Դաշնության խաղաղապահ զորակազմը տեղակայվում է 5 տարի ժամկետով` 5 տարվա ժամանակահատվածով ավտոմատ երկարաձգմամբ, եթե կողմերից որևէ մեկը ժամկետի ավարտից 6 ամիս առաջ չհայտարարի այդ դրույթի կիրառումը դադարեցնելու մտադրության մասին:
Ղարաբաղում խաղաղապահ գործողության գինն ու վարկանիշը. թվերն ավելի քան խոսուն են
