ԵՐԵՎԱՆ, 16 դեկտեմբերի – Sputnik. Ռուս խաղաղապահները 175 հեկտար տարածք են ականազերծել Ղարաբաղում: Տեղեկությունը հայտնում է Ռուսաստանի պաշտպանության նախարարությունը։
«Ընդհանուր առմամբ Լեռնային Ղարաբաղում ռուս խաղաղապահ ստորաբաժանումներն ականազերծել են 175 հեկտար տեղանք, ավելի քան 49 կիլոմետր ճանապարհ, ավելի քան 400 բնակելի շինություն ու սոցիալական օբյեկտ, մոտ հինգ հազար պայթուցիկ իր է հայտնաբերվել ու վնասազերծվել», - նշվում է հաղորդագրության մեջ։
Նշվում է, որ մեկ օրվա ընթացքում խաղաղապահները 9,5 կիլոմետր ճանապարհ են մաքրել։
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվել է Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորախումբը տեղակայմանը զուգահեռ դուրս են բերվում հայկական զինված ուժերը։ Ռուսաստանի Դաշնության խաղաղապահ զորակազմը տեղակայվում է 5 տարի ժամկետով` 5 տարվա ժամանակահատվածով ավտոմատ երկարաձգմամբ, եթե կողմերից որևէ մեկը ժամկետի ավարտից 6 ամիս առաջ չհայտարարի այդ դրույթի կիրառումը դադարեցնելու մտադրության մասին:
