ԵՐԵՎԱՆ, 16 դեկտեմբերի – Sputnik. Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովան այսօր, ամենշաբաթյա ճեպազրույցի ժամանակ պատմել է, թե ինչով են զբաղվում ԵԱՀԿ Միսնկի խումբն ու Ղարաբաղի հարցով մյուս կառույցները։
Ադրբեջանի խորհրդարանի փոխխոսնակ Ադիլ Ալիևն ավելի վաղ հայտարարել էր, որ ռուս խաղաղապահները Ղարաբաղի քարտեզը փոխելու իրավունք չունեն։ Նա նաև նոր կորուստների սպառնալիքներ էր ուղղել Հայաստանին ու նրա դաշնակից Ռուսաստանին:
ՌԴ ԱԳՆ ներկայացուցիչն այսօր շեշտել է, որ իրեն ապշեցրել է «պաշտպանելու իրավունք չունեն» արտահայտությունը:
«Մենք ելնում ենք նրանից, որ բոլոր հայտարարությունները պետք է ուղղված լինեն գլխավոր նպատակին հասնելուն, գլխավոր խնդրի լուծմանը՝ երկարաժամկետ խաղաղություն և լիարժեք կարգավորում», - ասել է Զախարովան:
Նրա խոսքով ՝ կարևոր և բարդ աշխատանք է կատարվել, ինչը նշանակում է, որ յուրաքանչյուր բառ պետք է կշռադատել ու հաշիվ տալ, թե ինչի համար է դա արտաբերվում։
«Ինչ վերաբերում է կոնկրետ մանրամասներին, լիազորություններին, երկրի իրավիճակին, ֆունկցիոնալ պարտականություններին, պարտականությունների բաշխման պատասխանատվության գոտուն, ապա այդ բոլոր հարցերը կարող են և պետք է լուծվեն կողմերի միջև աշխատանքային կարգով: Մենք երկխոսություն ենք վարում և՛ Բաքվի, և՛ Երևանի հետ բոլոր այն խողովակներով, որոնք գոյություն ունեն», - ասել է Զախարովան։
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվել է Ռուսաստանի Դաշնության խաղաղապահ զորակազմը ՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորախումբը տեղակայմանը զուգահեռ դուրս են բերվում հայկական զինված ուժերը։ Ռուսաստանի Դաշնության խաղաղապահ զորակազմը տեղակայվում է 5 տարի ժամկետով` 5 տարվա ժամանակահատվածով ավտոմատ երկարաձգմամբ, եթե կողմերից որևէ մեկը ժամկետի ավարտից 6 ամիս առաջ չհայտարարի այդ դրույթի կիրառումը դադարեցնելու մտադրության մասին:
Ղարաբաղում խաղաղապահ գործողության գինն ու վարկանիշը. թվերն ավելի քան խոսուն են
